قاي سالالارعا حالىق شاعىمى كوپ
ەلىمىزدە تۇتىنۋشىلاردىڭ شاعىمى جىل سايىن 30 پايىزعا ارتىپ كەلەدى. بۇل تۋرالى ءماجىلىستىڭ ەكونوميكالىق رەفورما جانە وڭىرلىك دامۋ كوميتەتىنىڭ وتىرىسىندا ساۋدا جانە ينتەگراتسيا ۆيتسە- ءمينيسترى قايرات بالىقبايەۆ ايتتى، دەپ حابارلايدى قازاقپارات ءتىلشىسى.

«جىل سايىن تۇتىنۋشىلار وتىنىشتەرىنىڭ سانى 30 پايىزعا ارتىپ كەلەدى. ەگەر 2020 -جىلى ۋاكىلەتتى ورگانعا 21 مىڭ ءوتىنىش تۇسسە، 2022 -جىلى تۇتىنۋشىلاردىڭ شاعىمدارىنىڭ سانى 30 مىڭعا دەيىن ۇلعايدى. وزگە مەملەكەتتىك ورگانداردا كەلىپ تۇسكەن شاعىمداردىڭ ارتۋى 2021 -جىلدى 2022 -جىلمەن سالىستىرعاندا 11 پايىزدى قۇرادى. وسىعان ۇقساس جاعداي تۇتىنۋشىلاردىڭ قوعامدىق بىرلەستىكتەرىنە شاعىمداردىڭ تۇسۋىمەن بايقالادى.
بۇل ەكونوميكانىڭ جەكەلەگەن سالالارىندا تۇتىنۋشى قۇقىعىن قورعاۋ سالاسىنداعى جۇيەلى پروبلەمالاردى كورسەتەدى»، - دەدى ول «تۇتىنۋشىلاردىڭ قۇقىقتارىن قورعاۋ تۋرالى» زاڭ جوباسىنىڭ جانە وعان ىلەسپە زاڭ جوباسىنىڭ تانىستىرىلىمى بارىسىندا.
حالىقتان شاعىمنىڭ دەنى كەلەسى سالالارعا قاتىستى:
بولشەك ساۋدا - 48 پايىز؛
تۇرمىستىق قىزمەتتەر - 19 پايىز؛
ەلەكتروندى ساۋدا - 9 پايىز.
شاعىمدار سانى ارتىپ كەلە جاتقان سالالار:
- قوعامدىق تاماقتاندىرۋ وبەكتىلەرىندە قىزمەت كورسەتۋدە - 2,8 ەسە؛
- كولىك جانە بايلانىس قىزمەتتەرىندە - 2,5 ەسە؛
- مەديتسينا قىزمەتىندە - 2 ەسە.
الايدا، ۆيتسە-ءمينيستردىڭ ايتۋىنشا، بۇل فاكتىلەر تۇتىنۋشىلار قۇقىعىن قورعاۋ سالاسىنداعى ىستەردىڭ ناقتى جاي-كۇيىن كورسەتپەيدى. سەبەبى كەيبىر تۇتىنۋشىلار بۇزىلعان قۇقىقتاردى قورعاۋ ءۇشىن مەملەكەتتىك ورگاندار مەن تۇتىنۋشىلاردىڭ قوعامدىق بىرلەستىكتەرىنە جۇگىنبەيدى.
«ونى تاۋەلسىز الەۋمەتتىك زەرتتەۋدىڭ ناتيجەلەرى دالەلدەيدى. ول بويىنشا ازاماتتاردىڭ مەديتسينا، ينتەرنەت- پروۆايدەرلەر، قوعامدىق كولىك قىزمەتتەرىنە نارازىلىعى كوپ. وسىعان بايلانىستى، ازاماتتاردىڭ كەلىپ تۇسكەن وتىنىشتەرىن تالداۋ مەن مونيتورينگ ناتيجەلەرىن، تۇتىنۋشىلاردىڭ قۇقىقتارىن قورعاۋدىڭ قوعامدىق ينستيتۋتتارىنىڭ پىكىرلەرى مەن ۇسىنىستارىن جانە الەۋمەتتىك زەرتتەۋ كورسەتكىشتەرىن نازارعا الا وتىرىپ، مينيسترلىك ەڭ الدىمەن جوسىقسىز بيزنەسپەن جۇمىس ىستەۋدىڭ الدىن الۋعا باعىتتالعان زاڭ جوبالارىن ازىرلەدى»، - دەدى قايرات بالىقبايەۆ.