قاي مينيسترلىكتەر مەن وبلىستار بيۋجەت قاراجاتىن يگەرە المادى

رەسپۋبليكالىق بيۋجەت بويىنشا 20 تريلليون تەڭگەگە شىعىستار جۇرگىزىلدى جانە 336 ميلليارد تەڭگە جۇمسالماي قالدى.

بۇل تۋرالى ق ر قارجى ءمينيسترى ەرۇلان جاماۋبايەۆ تولىققاندى ايتىپ بەردى، دەپ حابارلايدى Kazinform.

ءمينيستردىڭ ايتۋىنشا، مەملەكەتتىك بيۋجەت شىعىستارى - 96,5 پايىزعا، رەسپۋبليكالىق بيۋجەت شىعىستارى - 98,3 پايىزعا، جەرگىلىكتى بيۋجەت شىعىستارى 95,6 پايىزعا ورىندالدى.

«رەسپۋبليكالىق بيۋجەت بويىنشا 20 تريلليون تەڭگەگە شىعىستار جۇرگىزىلدى، ونىڭ ىشىندە 29 ميلليارد تەڭگە ۇنەمدەلگەن جانە 307 ميلليارد تەڭگە يگەرىلمەي قالعان. اسىرەسە ىشكى ىستەر، ونەركاسىپ جانە قۇرىلىس، توتەنشە جاعدايلار جانە مادەنيەت جانە اقپارات مينيسترلىكتەرىندە كوپتەگەن قاراجات يگەرىلمەگەن»، - دەدى ەرۇلان جاماۋبايەۆ ۇكىمەتتىڭ بۇگىنگى وتىرىسىندا.

يگەرىلمەۋدىڭ نەگىزگى سەبەپتەرى رەتىندە قارجى ءمينيسترى ءونىم بەرۋشىلەردىڭ تاۋارلاردى ۋاقىتىلى جەتكىزبەيتىنىن، كونكۋرستىق راسىمدەر دەر كەزىندە وتكىزىلمەيتىنىن، قوسىمشا كەلىسىمدەردى جاساسۋ راسىمدەرى ۇزاققا سوزىلاتىنىن ايتتى.

«جەرگىلىكتى بيۋجەتتەردىڭ شىعىستارى 12 تريلليون تەڭگەنى قۇرادى جانە 531 ميلليارد تەڭگە جۇمسالماي قالدى. بيىل وڭىرلەرگە 2 تريلليون تەڭگەگە جۋىق نىسانالى ترانسفەرتتەر كوزدەلگەن. ولارعا 1- جەلتوقسانعا 1 تريلليون 752 ميلليارد تەڭگە بولىنگەن جانە ونىڭ 89,8 پايىزى يگەرىلگەن. وندا 3 ميلليارد تەڭگە - ۇنەمدەلسە، 176 ميلليارد تەڭگە يگەرىلمەگەن. ەڭ كوپ يگەرىلمەۋ استانا قالاسى، ماڭعىستاۋ، اتىراۋ جانە باتىس-قازاقستان وبلىستارىندا قالىپتاستى»، - دەدى ەرۇلان جاماۋبايەۆ.

بۇعان دەيىن سپيكەر مەملەكەتتىك بيۋجەتكە 18,2 تريلليون تەڭگە تۇسكەنىن، جىل باسىنان بەرى جەرگىلىكتى بيۋجەتتەرگە تۇسكەن كىرىستەر جوسپاردان اسىرا ورىندالعانىن ايتقان ەدى.