قاتونقاراعايدا ەكو-قوناق ءۇي سالىنادى

  شىعىس قازاقستان وبلىسىنىڭ اكىمى ەرمەك كوشەربايەۆ ءوڭىردىڭ تۋريستىك الەۋەتىن دامىتۋ شارالارى تۋرالى ايتىپ بەردى، دەپ حابارلايدى Kazinform اگەنتتىگى.

«كاسىپكەرلىك تۋرالى ايتقاندا ءتۋريزمدى ايتپاۋ مۇمكىن ەمەس. تۋريزم باسقا دا قوسىمشا 50 دەن استام سالانى دامىتادى. بۇل باعىتتا ءبىز ەكى ماسەلەگە نازار اۋدارامىز. بىرىنشىدەن، جولدار - وبلىستا ورمان قورى كوپ. وكىنىشكە وراي، قولدانىستاعى زاڭناماعا سايكەس، ورمان قورى جەرلەرىندە جول سالۋعا تىيىم سالىنعان. شىعىس قازاقستاندا كوپتەگەن تۋريستىك ايماقتار ورمان قورى جەرلەرىندە نەمەسە تاۋلى جەرلەردە ورنالاسقان. بۇل ماسەلەنى ءبىزدىڭ ايماققا ىسساپارمەن كەلگەن ۇكىمەت باسشىلارىنا جەتكىزىپ، قولداۋ تاپتىق. بۇگىنگى تاڭدا ءتيىستى مينيسترلىكتەرمەن بىرلەسىپ شەشۋ جولىن ىزدەپ جاتىرمىز» ، - دەدى ە. كوشەربايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

سونداي- اق، اكىمنىڭ ايتۋىنشا، وبلىستى برەندكە اينالدىراتىن ءىس-شارالار قولعا الىنعان. وسى باعىتتا ۇلتتىق ءداستۇردى دامىتاتىن شارالار، حايكينگتەر، جازعى فەستيۆالدار وتكىزىلۋدە.

«قاتونقاراعاي اۋدانىندا قوناق ءۇي بيزنەسىنىڭ ءىرى حالىقارالىق وپەراتورى «TOR're» كومپانياسىنىڭ ەكو- قوناق ءۇيىنىڭ قۇرىلىسى باستالادى. مۇنداعى كاسىپكەر سەرىك تولىقپايەۆ - قاتونقاراعاي اۋدانىنىڭ تۋماسى. وبلىستىڭ تابيعي الەۋەتىن جانە كليماتتىق ەرەكشەلىكتەرىن پايدالانىپ، قىسقى سپورت تۇرلەرى ءۇشىن تۋريستىك جانە سپورتتىق ينفراقۇرىلىمدى جاقسارتۋ بويىنشا جۇمىس ىستەمەكپىز»، - دەيدى وبلىس اكىمى.

سونداي- اق بۇقتىرما جاعالاۋىنىڭ ينفراقۇرىلىمىن جاقسارتىپ، جازعى تۋريزم تۇرلەرىن دامىتۋ جوسپاردا بار.

«بيىل تۋريزمگە سالىناتىن سالىمدار وتكەن جىلعى كورسەتكىشتەن %36 عا ءوسىپ، 15 ميلليارد تەڭگەنى قۇرادى، كەلەسى جىلى بۇل سالاعا 18 ميلليارد تەڭگەدەن استام قاراجات جوسپارلانۋدا»، - دەدى ە. كوشەربايەۆ.

ايتا كەتەيىك، ەرمەك كوشەربايەۆ ەلوردادا شىعىس- قازاقستان وبلىسىنىڭ الەۋمەتتىك- ەكونوميكالىق دامۋى تۋرالى ەسەپ بەرىپ جاتىر.

بۇعان دەيىن ءوڭىر باسشىسى شىعىس قازاقستان وبلىسىنداعى ورتاشا جالاقى 305 مىڭ تەڭگە ەكەنىن ايتقان ەدى.

سونداي-اق، شىعىس قازاقستان وبلىسىندا ەكى سۋ قويماسى جاڭعىرتىلادى جانە جاڭا سۋ قويماسى سالىنادى.