قاتتى جەل: ت ج د استانالىقتارعا ۇندەۋ جاسادى

استانا. KAZINFORM — «قازگيدرومەت» رمك دەرەكتەرى بويىنشا 12 جەلتوقساندا استانادا وڭتۇستىك- باتىستان 15-20 م/س جەل سوعادى، تۇندە جانە تاڭەرتەڭ جەلدىڭ ەكپىنى 23 م/س دەيىن جەتەدى دەپ كۇتىلۋدە، دەپ حابارلايدى ەلوردا اكىمدىگىنىڭ رەسمي سايتى.

اۋا رايىنىڭ ناشارلاۋىنا بايلانىستى قاتتى جەل كەزىندە جازاتايىم وقيعالاردى بولدىرماۋ ءۇشىن استانا ت ج د مىناداي قاۋىپسىزدىك شارالارىن ساقتاۋدى سۇرايدى:

- جەل كۇشەيگەن كەزدە عيماراتتاردان شىعۋدى شەكتەۋ كەرەك (مۇمكىندىگىنشە ءۇي- جايلاردا بولىڭىز)؛

- بالالاردى باقىلاۋعا الۋ جانە ولاردى قاراۋسىز قالدىرماۋ؛

- ەگەر قاتتى جەل كەزىندە كوشەدە بولساڭىز، جەراستى وتكەلدەرىندە نەمەسە دۇكەندەردە پانالاۋدى ۇسىنامىز؛

- قاتتى جەلدەن ۇيلەردىڭ قابىرعالارىنا جاقىن جەردە جاسىرىنباڭىز، ويتكەنى شاتىرلاردان شيفەر مەن باسقا دا ماتەريالدار قۇلاۋى مۇمكىن؛

- ەشبىر جاعدايدا قوعامدىق كولىك ايالدامالارىنىڭ، بيلبوردتاردىڭ، قۇرىلىسى اياقتالماعان عيماراتتاردىڭ، اعاشتاردىڭ استىندا جاسىرىنۋعا تىرىسپاڭىز؛

- ەلەكتر جەلىسىنىڭ استىندا تۇرىپ، ۇزىلگەن ەلەكتر سىمدارىنا جاقىنداۋ وتە قاۋىپتى؛

- كولىكتى شىرىگەن جانە ەسكى اعاشتاردىڭ جانىنا قالدىرماڭىز.

سونىمەن قاتار، قۇتقارۋشىلار قاتتى ايازدا ءوزىن قالاي ۇستاۋ كەرەكتىگى تۋرالى ۇسىنىستار بەردى:

- ۇنەمى قوزعالۋ كەرەك، ءبىر جەردە تۇرۋعا بولمايدى، اسىرەسە قارعا نەمەسە سۋىق زاتتارعا وتىرماۋ كەرەك. بۇل رەتتە مەتالل مەن بەتون تىپتەن قاۋىپتى؛

- اياز كەزىندە اش جۇرمەڭىز، تاماق ىشۋگە ۋاقىت ءبولىڭىز. ىستىق سۋسىندار قۇيىلعان تەرموس الىپ ءجۇرىڭىز؛

- جامان ادەتتەر تۋرالى ۇمىتىڭىز، الكوگولدى ىشپەڭىز؛

-  تابانى قالىڭ اياق كيىمدى تاڭداڭىز؛

- اياق- قولدار مەن دەنەنىڭ اشىق جەرلەرىن جابىڭىز؛

- قالىڭ كيىم كيىپ ءجۇرىڭىز.

توتەنشە جاعداي تۋىنداعان كەزدە «101» جانە «112» نومىرلەرىنە قوڭىراۋ شالىڭىز.