قاتەرلى ىسىككە قارسى قازاقستاندىق پرەپارات قاشان شىعارىلادى

استانا. قازاقپارات - 1-شىلدەدە قاتەرلى ىسىككە قارسى قازاقستاندىق پرەپاراتتى سىناقتان وتكىزۋدىڭ ەكىنشى كەزەڭى باستالدى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ءمالىم ەتتى.

«ادامدارعا جاسالعان كلينيكالىق سىناقتاردىڭ ءبىرىنشى كەزەڭى ءساتتى اياقتالدى. الماتىداعى راديولوگيا ينستيتۋتىندا 15 ونكولوگيالىق ناۋقاس ەمدەلدى، ناتيجەلەرىنە ۇلكەن ءۇمىت ارتىپ وتىرمىز. بۇل ماسەلەنى پرەمەر-مينيستر جەكە باقىلاۋىنا الدى. دەنساۋلىق ساقتاۋ مينيسترلىگىمەن بىرلەسىپ ارنايى جۇمىس توبىن قۇردىق، وسى ورايدا مينيسترلىككە العىس ايتامىن»، - دەدى ساياسات نۇربەك ۇكىمەت وتىرىسىنان كەيىن وتكەن باسپا ءسوز ءماسليحاتىندا.

سونداي-اق مينيستر 1-شىلدەدە پرەپاراتتى تەستىلەۋدىڭ ەكىنشى كەزەڭى باستالعانىن ايتتى. سىناقتان وتۋگە 5 مىڭنان استام ونكولوگيالىق ناۋقاستار جازىلعان.

«ءوز ەرىكتەرىمەن جازىلعان ناۋقاستار سىناقتىڭ ەكىنشى كەزەڭىنە قاتىسادى. وعان جوعارى عىلىمي-تەحنيكالىق كوميسسيانىڭ شەشىمىمەن شامامەن 2 ميلليارد تەڭگە قاراستىرىلعان. جىلدىڭ سوڭىنا دەيىن پرەپاراتتى سىناقتان وتكىزۋدىڭ ەكىنشى كەزەڭى اياقتالادى، ال كەلەسى جىلى ونى تىركەۋگە شىعارامىز دەپ ۇمىتتەنەمىز»، - دەيدى ول.

ۆەدومستۆو باسشىسىنىڭ ايتۋىنشا، قاتەرلى ىسىككە قارسى ءدارىنى تەستىلەۋ استانا، الماتى جانە پاۆلودار قالاسىندا ءوتىپ جاتىر.

ەسكە سالا كەتەيىك، بيىل قاڭتاردا قازاقستاندىق بيوتەحنولوگ دوس سارباسوۆ قاتەرلى ىسىككە قارسى پرەپارات جاساپ شىعارعانى تۋرالى حابارلاعان ەدىك. يننوۆاتسيالىق ءدارىنى الدىمەن قوياندار مەن تىشقاندارعا سىناعان، سوسىن ونكولوگيا ۋنيۆەرسيتەتىندە 15 ادام سىناقتىڭ ءبىرىنشى كەزەڭىنەن وتكەن.

اۆتور
داۋلەت ىزتىلەۋ