قاتەرلى ىسىك اۋرۋىن تۋدىرۋى مۇمكىن 6 ادەت

 ءبىزدىڭ كۇنىمىز ويلانباستان جاسايتىن، كۇندە قايتالاناتىن ارەكەتتەر تىزبەگىنەن تۇرادى. 

بىزگە قاراپايىم بولىپ كورىنەتىن كەيبىر ادەتتەر ءسىز ويلاعانداي زيانسىز ەمەس. ءبىر قاراعاندا قالىپتى كورىنەتىن ءدام مەن ءومىر سالتىنىڭ ەرەكشەلىكتەرى قاتەرلى ىسىك قاۋپىن ارتتىرۋى مۇمكىن.

قاتەرلى ىسىك اۋرۋىن تۋدىرۋى مۇمكىن 6 ادەت

وتىرىقشى جۇمىس. كەڭسەدە جانە ۇيدە جۇمىس ىستەيتىندەر وتىرىقشى ءومىر سالتى قاتەرلى ىسىك اۋرۋىنىڭ ماڭىزدى قاۋىپ فاكتورى ەكەنىن ەستە ۇستاعان ءجون. ساراپشىلار فيزيكالىق بەلسەندىلىككە مۇمكىندىگىنشە كۇنىنە كەم دەگەندە جارتى ساعات ءبولۋدى ۇسىنادى. وتىرىقشى ءومىر سالتى اسىرەسە وكپە، ەندومەتريالىق جانە ىشەك قاتەرلى ىسىگىنىڭ دامۋ قاۋپىنە اسەر ەتەدى. ادام نەعۇرلىم كوپ وتىراتىن بولسا، قاتەرلى ىسىكتىڭ وسى تۇرلەرىنە شالدىعۋ قاۋپى سوعۇرلىم جوعارى بولادى.

ءتاتتى گازدالعان سۋسىندار. مۇنداي سۋسىنداردىڭ - ءتاتتى جانە كالوريا مولشەرى كوپ، گليكەميالىق يندەكسى وتە جوعارى، ولار ەندومەتريا قاتەرلى ىسىگىنىڭ دامۋ قاۋپىن ارتتىرادى. بۇل سۋسىنداردى كوپ مولشەردە ءىشۋ قانداعى قانت دەڭگەيىنىڭ جانە ينسۋلين ءوندىرىسىنىڭ جوعارىلاۋىنا اكەلەدى. بۇل ءوز كەزەگىندە جاتىردى قاپتايتىن ەندومەتريا جاسۋشالارىنىڭ بەلسەندى ءبولىنۋىن تۋدىرادى. سونداي-اق گازدالعان ءتاتتى سۋسىنداردى شامادان تىس تۇتىنۋ ۇيقى، ءسۇت جانە انالىق بەزىنىڭ قاتەرلى ىسىگى سياقتى اۋرۋلاردىڭ پايدا بولۋىنا سەبەپ بولاتىنى دالەلدەندى.

ىستىق سۋسىندار. ارينە، الكوگولدىك نەمەسە گازدالعان سۋسىندارعا قاراعاندا، شاي مەن كوفە الدەقايدا پايدالى. وعان قوسا، كوفە قاتەرلى ىسىككە قارسى اسەر ەتىپ، ءارتۇرلى ونكولوگيالىق اۋرۋلاردىڭ پايدا بولۋ قاۋپىن ازايتادى. دەگەنمەن، تىم ىستىق سۋسىندار دا ايتارلىقتاي زيان كەلتىرۋى مۇمكىن. ماسەلە ىستىقتان ءتىل نە ىشكى اعزانىڭ كۇيىپ قالۋىندا ەمەس. ىستىق سۋسىنداردى ۇناتاتىن ادامداردا وڭەش پەن تاماق قاتەرلى ىسىگى سۋسىندى سالقىن كۇيدە تۇتىناتىندارعا قاراعاندا ءجيى كەزدەسەدى.

تۇنگى اۋىسىمدا جۇمىس ىستەۋ. 2018 -جىلى جۇرگىزىلگەن زەرتتەۋدىڭ ناتيجەسىنە سايكەس، تۇندە جۇمىس ىستەيتىن ايەلدە قاتەرلى ىسىكتىڭ كەز كەلگەن ءتۇرىنىڭ دامۋ قاۋپى ادەتتەگى كەستە بويىنشا جۇمىس ىستەيتىندەرگە قاراعاندا 19 پايىزعا جوعارى. مۇنداي جۇمىس ۇيقى مەن بيوريتمدى قالىپقا كەلتىرىپ، قاتەرلى ىسىكتىڭ دامۋىنا كەدەرگى كەلتىرەتىن مەلاتونين ءوندىرىسىن بۇزادى.

ءتىستى دۇرىس تازالاماۋ. عالىمداردىڭ ايتۋىنشا، كوپ ادام ءتىس تازالاۋعا جاۋاپكەرشىلىكپەن قارامايدى. الايدا بۇل ءتىستىڭ ساۋلىعىنا كەرى اسەر ەتىپ قانا قويماي، باسقا دا ماسەلەلەر تۋدىرۋى مۇمكىن. ءتىس پەن قىزىل يەكتىڭ جاعدايى قاتەرلى ىسىك اۋرۋىن قوزدىراتىن فاكتور. ال پارودونتپەن اۋىراتىن ادامداردا وكپە جانە كولورەكتالدى قاتەرلى ىسىكتىڭ پايدا بولۋ قاۋپى 24 پايىزعا ارتادى ەكەن.

كوكىرەكشەدەگى ۇيالى تەلەفون. دارىگەرلەر تەلەفوندى كوكىرەكشەگە قويۋعا داعدىلانعان قىزداردا ءسۇت بەزى ىسىكتەرىنىڭ كەم دەگەندە جەتى جاعدايىن تىركەگەن. ىسىك تۋرا گادجەتتى سالعان جەردە پايدا بولعان، بۇل ءسۇت بەزى قاتەرلى ىسىگىنىڭ اتيپتى ورنالاسۋى. سوندىقتان ۇيالى تەلەفون ساقتاۋعا ىڭعايلى دەپ ونى كوكىرەكشەگە سالعان دۇرىس ەمەس.

Massaget.kz