قاتەلەسىپ تۇسكەن بومبا: وڭتۇستىك كورەياداعى اپاتتان جارالانعاندار سانى ارتتى

سەۋل. KAZINFORM - وڭتۇستىك كورەيا اسكەري-اۋە كۇشتەرىنىڭ ەكى KF-16 جويعىش ۇشاعى جاتتىعۋ كەزىندە الاڭنان قاتەلەسىپ، وقۋ-جاتتىعۋ ورنىنا جاقىن جەردەگى اۋىلعا 8 بومبا تاستاعان. جارالانعاندار سانى 15 ادامعا جەتتى، دەپ حابارلادى Yonhap.

بيلىكتىڭ حابارلاۋىنشا، جارىلىس سەۋلدەن سولتۇستىككە قاراي 40 شاقىرىمداي جەردەگى پحوچحون اۋىلىندا تاڭعى ساعات 10-دار شاماسىندا بولعان. 15 ادام جاراقات العان، ونىڭ ىشىندە ەكى سارباز بەن ەكى شەتەلدىك ازامات بار. شىركەۋ مەن تاعى جەتى عيماراتقا زاقىم كەلگەن.

ءورت سوندىرۋشىلەر بەتى جانە يىعىنان اۋىر جاراقات العان ەكى ازاماتتى اۋرۋحاناعا جەتكىزدى. قۇتقارۋشىلار قازىر ولاردىڭ ومىرىنە قاۋىپ ءتونىپ تۇرعان جوق ەكەنىن مالىمدەدى. تاعى سەگىز ادام جەڭىل جاراقاتپەن اۋرۋحاناعا جەتكىزىلگەن.

بيلىك زارداپ شەككەندەر سانى ارتادى دەپ بولجاپ وتىر، سەبەبى مەديتسينالىق كومەككە جۇگىنگەن ادامدار كوپ.

ايماقتىڭ 50-گە جۋىق تۇرعىنى ەۆاكۋاتسيالاندى. اۋە كۇشتەرى «اپاتتى» شتاب باستىعىنىڭ ورىنباسارى گەنەرال-لەيتەنانت پاك كي ۆاننىڭ باسشىلىعىمەن تەرگەپ جاتقانىن ايتىپ، بەيبىت تۇرعىندارعا كەلتىرىلگەن شىعىن ءۇشىن كەشىرىم سۇرادى.

- ءبىز بەيبىت تۇرعىندارعا زيان كەلتىرىلگەنىمىز ءۇشىن وكىنىش بىلدىرەمىز جانە زارداپ شەككەندەردىڭ تەزىرەك ساۋىعىپ كەتۋىن تىلەيمىز. ءبىز بارلىق قاجەتتى شارانى قولدانامىز، كەلتىرىلگەن زالالدىڭ ورنىن تولتىرامىز، - دەلىنگەن اۋە كۇشتەرى مالىمدەمەسىندە.

ايتا كەتەيىك، وقۋ-جاتتىعۋعا 160 تان استام اسكەري تەحنيكا، سونىڭ ىشىندە K2 تانكتەرى، K55A1 گاۋبيتسالارى، شابۋىلداعىش تىكۇشاقتار جانە F-35A ۇشاقتارى قاتىسقان.

بۇعان دەيىن وڭتۇستىك كورەيا اسكەري-اۋە كۇشتەرىنىڭ ەكى KF-16 جويعىش ۇشاعى جاۋىنگەرلىك جاتتىعۋلار كەزىندە پوليگون سىرتىنا قاتەلەسىپ سەگىز بومبا تاستاۋى سالدارىنان 7 ادام جاراقات العانىن جازعان ەدىك.

اۆتور

جاراسقان نۇرىبايەۆ