قاڭتاردان باستاپ شەتەلدىكتەر ءۇشىن رەسەيگە كىرۋ ەرەجەسى قاتاڭدايدى

استانا. قازاقپارات — 2025-جىلدىڭ 1-قاڭتارىنان باستاپ رەسەيگە كىرەتىن شەتەلدىك ازاماتتاردىڭ ۋاقىتشا بولۋ مەرزىمى تۋرالى زاڭنامالىق وزگەرىستەر كۇشىنە ەندى. رەسەي فەدەراتسياسىنا تابان تىرەگەن شەتەلدىكتەردىڭ سوندا بولۋ مەرزىمى 90 تاۋلىككە قىسقاردى، دەپ حابارلايدى قازاقستاننىڭ رەسەيدەگى ەلشىلىگى.

بۇرىن ەلگە ۆيزاسىز كىرگەن شەتەلدىكتەر رەسەيدە 180 كۇن ىشىندە 90 كۇننەن اسپاۋى كەرەك ەدى. ەلشىلىك رەسەي فەدەراتسياسىنىڭ اۋماعىندا جىلىنا 90 تاۋلىكتەن استام وقۋعا، جۇمىس ىستەۋگە، ۋاقىتشا تۇرۋعا نەمەسە باسپانا الۋعا كەلگەن ازاماتتارعا رۇقسات ەتىلگەنىن تۇسىندىرەدى.

وزگەرىستەر رەسەي فەدەراتسياسىنا ۆيزاسىز كەلگەن شەتەلدىك ازاماتتارعا قولدانىلادى. رەسەيگە ۆيزامەن كەلگەن شەتەلدىكتىڭ ۋاقىتشا بولۋ مەرزىمى، بۇرىنعىداي، وزگەرىسسىز قالىپ وتىر.

سونداي-اق، «ينتەرفاكس» حابارلاعانداي، رەسەي پرەزيدەنتى ۆلاديمير پۋتين زاڭسىز ميگرانتتاردى 2025-جىلدىڭ 30-ساۋىرىنە دەيىن رەسەيدەن كەتۋگە مىندەتتەيتىن جارلىققا قول قويدى.

قالعىسى كەلەتىن ميگرانتتار زاڭداستىرىلۋى كەرەك: كوشى-قون قىزمەتىندە تىركەلۋ، بيومەتريالىق جانە مەديتسينالىق مالىمەتتەردى، ورىس ءتىلىن بىلەتىندىگىن، رەسەي تاريحى مەن رەسەي فەدەراتسياسىنىڭ زاڭناماسىنىڭ نەگىزدەرىن بىلەتىندىگىن راستايتىن قۇجاتتاردى ۇسىنۋ، سونىمەن قاتار تۇرۋعا جانە جۇمىس ىستەۋگە رۇقسات بەرۋ.

رەسەي فەدەراتسياسىنىڭ قورعانىس مينيسترلىگىمەن كەلىسىمشارتقا وتىرعان شەتەلدىكتەرگە ەرەكشە جاعداي جاسالماق.

بۇعان دەيىن حابارلانعانداي، كەرىسىنشە ازەربايجان رەسەي ازاماتتارىنىڭ ەلگە كىرۋ ەرەجەلەرىن قاتاڭداتپاق.