قاڭتارداعى ۇ ب ت: ەكى اپتادا 79 مىڭنان استام تالاپكەر تەست تاپسىردى

استانا. KAZINFORM - قاڭتار ايىنداعى ۇ ب ت- نىڭ ەكى اپتاسىندا 79 مىڭنان استام ادام تەست تاپسىردى. شەكتى بالدى 70 پايىزعا جۋىق تالاپكەر جينادى. بۇل تۋرالى عىلىم جانە جوعارى ءبىلىم مينيسترلىگى مالىمدەدى.

ЕНТ ҰБТ
Фото: Kazinform

تەستىلەۋ ناتيجەسى بويىنشا ورتاشا بال 65 بالدى قۇرادى. ەڭ جوعارى بال – 137، ونى ەكى وقۋشى جينادى.

تەستكە قاتىسۋشىلاردىڭ 76,8 پايىزى قازاق تىلىندە، 23,1 پايىزى ورىس تىلىندە، 46 ادام اعىلشىن تىلىندە تەستىلەۋدەن ءوتتى.

تالاپكەرلەردىڭ باسىم بولىگى، 16,9 پايىزدان «ماتەماتيكا-فيزيكا» جانە «بيولوگيا-حيميا» پاندەر كومبيناتسياسىن تاپسىردى. 10,3 پايىزى «شىعارماشىلىق ەمتيحان» كومبيناتسياسىن تاڭداعان. ەڭ از تاڭدالعان كومبيناتسيا - «حيميا-فيزيكا»، ونى 105 ادام تاپسىرعان.

ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ارقاسىندا قاڭتار ۇ ب ت- سىنا 203 تالاپكەر قاتىستى.

تالاپكەرلەر تەستىلەۋ اياقتالعاننان كەيىن 30 مينۋت ىشىندە اپەللياتسياعا بەرە الادى، بۇل جاعدايدا سەرتيفيكات اپەللياتسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.

قازىرگى تاڭدا 111 ادامنىڭ ناتيجەسى جويىلدى. ونىڭ ىشىندە 70 تالاپكەر سمارتفون جانە شپارگالكا سياقتى تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى، ال تەستىلەۋ كەزىندە ەرەجەلەردى بۇزعانى ءۇشىن اۋديتوريادان 41 ادام شىعارىلدى. وزگە تۇلعالار انىقتالعان جوق.

ايتا كەتسەك، 2025-جىلعى ۇبت اياقتالعاننان كەيىن كۇنتىزبەلىك جىلدىڭ 31-قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇ ب ت ناتيجەلەرى جويىلادى.

ەستەرىڭىزگە سالا كەتسەك، قاڭتار ۇ ب ت- سى 13-قاڭتار مەن 10-اقپان ارالىعىندا وتەدى. تەستىلەۋگە قاتىسۋعا 167 مىڭعا جۋىق تالاپكەر نيەت بىلدىرگەن.

سوڭعى جاڭالىقتار