قاڭتاردا الماتى اكىمدىگى مەن پرەزيدەنت رەزيدەنتسياسىن باسىپ العان 11 ادامعا ۇكىم شىقتى

الماتى. KAZINFORM - الماتىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا جاپپاي تارتىپسىزدىك پەن شابۋىلعا قاتىسىپ، كۇزەتىلەتىن وبەكتىلەردى باسىپ الدى، سونداي- اق بيلىك وكىلدەرىنە زورلىق- زومبىلىق كورسەتتى (272-باپ، 269-1-باپ 3-باپ 380-باپ) دەپ ايىپتالعان 11 سوتتالۋشىنىڭ ءىسى قارالدى.

2022 -جىلدىڭ 4-5-قاڭتارىندا سوتتالۋشىلار جاپپاي تارتىپسىزدىككە قاتىسىپ، قورعالاتىن وبەكتىلەرگە - الماتى قالاسىنىڭ اكىمدىگىنە، پرەزيدەنت رەزيدەنتسياسىنا، پوليتسيا باسىلىمىنا زاڭسىز كىرگەن.

سوتتالۋشىلاردىڭ قىلمىستىق ارەكەتى مۇلىكتىڭ جويىلۋىنا ۇلاسىپ اۋىر زارداپتارعا اكەلدى.

تارتىپسىزدىك بارىسىندا ءۇش سوتتالۋشى قوعامدىق ءتارتىپ ورناتۋ جونىندە شارالار قابىلداعان اسكەري قىزمەتشىلەر مەن قۇقىق قورعاۋ ورگاندارىنىڭ قىزمەتكەرلەرىنە زورلىق-زومبىلىق كورسەتتى.

ال، سوتتالۋشىلاردىڭ بىرەۋى ەكى اسكەري كۋرسانتتى تۇتقىنعا الىپ، ولارعا جەڭىل دەنە جاراقاتتارىن كەلتىرگەن.

سوتتالۋشىلار كىناسىن جارتىلاي مويىندادى.

اتالعان قىلمىستار اۋىر جانە اسا اۋىر قىلمىستار ساناتىنا جاتادى.

جازا تاعايىنداۋ كەزىندە سوت جاۋاپكەرشىلىكتى جەڭىلدەتەتىن جاعدايلاردى ەسكەردى: سوتتالۋشىلاردىڭ كامەلەتكە تولماعان بالالارىنىڭ بولۋىن، دەنساۋلىق جاعدايلارىن، وتباسىلىق جاعدايلارىن جانە بۇرىن سوتتى بولماعاندارىن.

جوعارىدا ايتىلعانداردى ەسكەرە وتىرىپ، سوت 10 سوتتالۋشىنى ق ك 272-بابىنىڭ 2-بولىگى، 380-بابىنىڭ 3-بولىگى، 269-بابىنىڭ 3-بولىگى-1) ، 4) ، 8) تارماقشالارى بويىنشا كىنالى دەپ تاپتى.

راقىمشىلىق تۋرالى زاڭ قولدانىلا وتىرىپ، ولاردىڭ ءارقايسىسى 1  جىلعا 9 ايعا باس بوستاندىعىنان ايىرىلدى.

ءبىر سوتتالۋشى ق ك 272-بابىنىڭ 2-بولىگى، 380-بابىنىڭ 3-بولىگى، 1) ، 4) ، 8) - تارماقتارى، 269-1-بابىنىڭ 3-بولىگى، 261-بابىنىڭ 3-بولىگى بويىنشا كىنالى دەپ تانىلدى.

ول راقىمشىلىق تۋرالى زاڭى اياسىندا 4 جىلعا باس بوستاندىعىنان ايىرىلدى.

ۇكىم زاڭدى كۇشىنە ەنگەن جوق.