قاڭتاردا 4 جاسار ايكوركەمدى اتتى دەپ ايىپتالعان اسكەري قايتا سوتتالدى

қаңтар
Фото: Мақсат Шағырбаев/Kazinform

استانا. KAZINFORM - اسكەري سوتتىڭ قىلمىستىق ىستەر جونىندەگى سوت القاسى قارۋ قولدانۋ ارقىلى بيلىگىن اسىرا پايدالاندى دەپ ايىپتالعان (ق ك 451-بابى 2-بولىگىنىڭ 1-تارماعى) اسكەري قىزمەتشى ارمان جۇماننىڭ ءىسىن اپەللياتسيالىق تارتىپتە قايتا قارادى.

بۇعان دەيىن كاسساتسيالىق سوت القاسى جابىرلەنۋشى تاراپتىڭ شاعىمى مەن پروكۋروردىڭ نارازىلىعى نەگىزىندە اپەللياتسيالىق سوت القاسى ۇكىمىنىڭ كۇشىن جويىپ، ەكىنشى ساتىلى سوتقا قايتا قاراۋعا جولداعان.

قىلمىستىق ءىس جابىق سوت وتىرىسىندا «قۇپيا» بەلگىسىمەن قارالعان.

وقيعا بىلاي بولعان.

2022-جىلى 7-قاڭتار ساعات 19.30 شاماسىندا سوتتالۋشى جۇمان بلوكبەكەتتە قاراماعىنداعى اسكەري قىزمەتشىلەرگە بەكەتكە جاقىنداپ كەلە جاتقان اۆتوكولىككە وق اتۋ جونىندە زاڭسىز بۇيرىق بەرگەن.

سالدارىنان 2017-جىلى تۋعان جاس بالا وق جاراقاتىنان قايتىس بولىپ، 2006-جىلى تۋعان تاعى ءبىر بالاعا 5 وقتان دەنساۋلىعىنا اۋىر زيان كەلدى.

سوتتالۋشىنىڭ كىناسى ءىس بويىنشا جينالعان دالەلدەمەلەرمەن، ياعني جابىرلەنۋشىلەر مەن كۋاگەرلەردىڭ ايعاقتارىمەن، سوت ساراپتاماسىنىڭ قورىتىندىسى جانە زاتتاي دالەلدەمەلەرمەن دالەلدەندى.

اسكەري سوتتىڭ سوت القاسى اقتاۋ ۇكىمىنىڭ كۇشىن جويىپ، جاڭا ۇكىم شىعاردى.

وعان سايكەس ق ك 451-بابى 2-بولىگىنىڭ 1-تارماعى بويىنشا جۇمان كىنالى دەپ تانىلىپ، 7 جىلعا باس بوستاندىعىنان ايىرىلدى.

اپەللياتسيالىق ۇكىم زاڭدى كۇشىنە ەندى.

ەسكە سالا كەتەيىك، بىلتىر قاراشادا اسكەري سوت ارمان جۇماندى كىناسىز دەپ تانىپ، تولىق اقتاعان ەدى.

الايدا بيىلعى ناۋرىزدا اپەللياتسيا القاسى ونى 7 جىلعا سوتتادى.

6-ماۋسىمدا جوعارعى سوت بۇل ءىستى قايتا قاراۋعا جىبەردى.

سوڭعى جاڭالىقتار