قاڭتار وقيعاسى: تالدىقورعاندا پوليتسيا عيماراتىنان قارۋ ۇرلاعاندار سوتتالدى
تالدىقورعان قالالىق سوتىندا 6 كۇدىكتىگە قاتىستى قارۋدى ۇرلاۋ، زاڭسىز ساتىپ الۋ، ساقتاۋ فاكتىسى بويىنشا قىلمىستىق ءىسى قارالدى، دەپ حابارلايدى قازاقپارات ءتىلشىسى.

سوتتا انىقتالعانداي، 2022-جىلى قاڭتاردىڭ 5 نەن 6 نا قاراعان ءتۇنى ەكى ەر ادام پوليتسيا دەپارتامەنتىنىڭ عيماراتىنان اتىس قارۋى مەن وق-دارىلەردى ۇرلاپ، كەيىن ولاردىڭ ءبىرى ءوزىنىڭ ەكى تانىسىن قارۋ ساتۋعا كوندىرگەن. تانىستارى قارۋ مەن ونىڭ كەرەك-جاراقتارىن ساتىپ الاتىن ەكى ادامدى تابادى.
«وسى جىلدىڭ 18- قاڭتارىندا ەكى سوتتالۋشى ساتىپ الۋشىمەن كەزدەسىپ، وعان 1 ميلليون تەڭگەگە 2 اۆتومات پەن پاتروندارى بار كارابين ساتىپ الۋدى ۇسىنعان. سول كۇنى كەشكە پوليتسيا قىزمەتكەرلەرى ولاردى ۇستادى»، - دەلىنگەن قالالىق سوت مالىمەتىندە.
سوتتالۋشىلار ءوز كىنالارىن تولىق مويىنداپ، وكىنەتىندەرىن ايتتى. سوت 6 ايىپتالۋشىنىڭ ءارقايسىسىنا 3 جىلعا باس بوستاندىعىنان ايىرۋ جازاسىن تاعايىنداپ، جازالارىن قىلمىستىق-اتقارۋ جۇيەسىنىڭ ورتاشا قاۋىپسىز مەكەمەسىندە وتەۋگە ۇكىم شىعاردى.
ۇكىم زاڭدى كۇشىنە ەنگەن جوق.