قاڭتار وقيعاسى كەزىندە ەرىكتى بولىپ جۇمىس ىستەگەن جاس بۇل قادامعا نە ءۇشىن بارعانىن ايتتى

Қаңтар оқиғасы кезінде ерікті болып жұмыс істеген жас бұл қадамға не үшін барғанын айтты
Фото: Кейіпкердің жеке мұрағатынан

  مەملەكەت باسشىسى قاسىم-جومارت توقايەۆ Egemen Qazaqstan گازەتىنە بەرگەن سۇحباتىندا قاڭتار وقيعاسىنا تولىق توقتالىپ، ودان ساباق الۋ قاجەتتىگىن اتاپ ءوتتى.

وسىعان وراي سول كۇندەرى ەرىكتى قىزمەتىن اتقارعان تەلەجۇرگىزۋشى ەرنۇر كىناما Kazinform ءتىلشىسىنىڭ ساۋالدارىنا جاۋاپ بەردى.

- ەرنۇر، قاڭتار وقيعاسى كەزىندە ەرىكتى رەتىندە قىزمەت اتقارعان ەكەنسىڭ، الدىمەن سول تۋرالى ايتىپ بەرسەڭ.

- قاسىرەتتى قاڭتار وقيعاسى قازاق ەلىنە سىن بولدى. باستاپقىدا بەيبىت باستالعان تولقۋلاردى زۇلىمدار ءوز ماقساتىنا پايدالانىپ، قايماعى بۇزىلماعان قايمانا حالقىمىزدىڭ بەرەكە-بىرلىگىن بۇزۋعا بارىنشا تىرمىستى. قالالاردى قيراتتى، قان توكتى، ەلدى ۇرەيگە سالدى. تاۋەلسىزدىگىمىز تالقىعا تۇسكەن تاريحي ساتتە مەملەكەت باسشىسى تاراپىنان باتىل قابىلدانعان شەشىمدەر، حالقىمىزدىڭ بايسالدىلىعى ەلدىگىمىزدى ساقتاپ قالۋعا سەپتىگىن تيگىزدى. وسى ۋاقىتتا ءار قالادا قاۋمالاعان قالىڭ بۇقارانىڭ توپتاسۋىمەن ءتۇرلى شەرۋلەر بولدى. ءبىزدىڭ ورال قالاسىندا دا ءدال سونداي سىن ساعاتتا جاستار بەلسەنە ارالاسىپ، حالىقتى سابىرعا شاقىردى. ەرىكتى رەتىندە ءوز قىزمەتتەرىن كورسەتتى.

ەلدە ينتەرنەت جەلىسى سونگەندىكتەن، تۇرعىندار قاجەتتى اقپارات كوزدەرى مەن كۇندەلىكتى تۇرمىستىق قاجەتتىلىككە قول جەتكىزە الماي، قينالىپ قالدى. كوڭىلگە كۇدىك ۇيالاپ، اينالانى ۇمىتسىزدىك باسپاس ءۇشىن وسى ساتتە ەرىكتىلەر ساپىندا مەن دە بولىپ، حالىققا قولۇشىن بەرۋگە بەل بۋدىم. ۇيقى كورمەي، ەل تىنىشتىعىن كۇزەتكەن اسكەريلەر مەن ءتارتىپ ساقشىلارىنا ازىق-تۇلىك اپاردىق. ارداگەرلەر مەن از قامتىلعان، كوپبالالى وتباسىلار دا ۇمىت قالعان جوق. شاھار توڭىرەگىندەگى كەنتتەر مەن شاعىناۋدانداردا كەشكى كەزەكشىلىكتە تۇردىق. تۇرعىنداردىڭ ابىرجىماي، شىنايى اقپارات الۋىنا ۇلەس قوستىق.

- سول كۇندەرى ورال قالاسىندا قاقتىعىستارعا جول بەرىلگەن جوق. بۇعان قالاي قول جەتتى دەپ ويلايسىڭ؟ قاۋىپ-قاتەرگە تولى شاقتا ادامدار ءبىر-بىرىنە قالاي كومەكتەستى؟

- ءيا، شۇكىر، شاھارىمىزدا ەشقانداي وقىس جاعداي بولمادى. ورتالىق الاڭعا جينالعاندار سابىر ساقتاپ، جەرگىلىكتى بيلىكتىڭ سوزىنە قۇلاق استى. وسىلايشا، ىڭ- شىڭسىز تاراپ، ەڭ باستىسى، قان توگىلگەن جوق. بۇل تۇرعىندارىمىزدىڭ ەل بىرلىگى مەن ەگەمەندىگىنە بەيجاي قارامايتىنىنىڭ ءبىر دالەلى دەپ بىلەمىن. ءدال وسى شاقتا ولار ءبىر-بىرىنە دەمەۋ بولدى، قولداۋ ءبىلدىردى، كومەگىن ۇسىندى. بۇل دا ءبىر عانيبەت. نەگىزى، جاڭالىق جۇرگىزۋشىسى بولىپ جۇمىس ىستەيمىن. ەرىكتىلىكتى قوعامدىق قىزمەت ەسەبىندە كورەمىن، قيىن-قىستاۋ كەزدە ەلگە سەپتەسۋ ازاماتتىق بورىشىم دەپ بىلەمىن.

- الداعى ۋاقىتتا مۇنداي وقيعا بولماس ءۇشىن نە ىستەۋ كەرەك دەپ ەسەپتەيسىڭ؟

- مەملەكەت باسشىسى ايتقانداي، مۇنداي قايعىلى وقيعا قايتالانباس ءۇشىن ءبارىمىز دە ودان ساباق الا ءبىلۋىمىز كەرەك دەپ ويلايمىن. بيلىك تۇتقاسىن ۇستاعانداردان باستاپ قاراپايىم ادامدارعا دەيىن سابىر ساقتاپ، وتكەن-كەتكەننەن وي ءتۇيىپ، بولاشاقتى بولجاپ، ەلدىكتى ءبىرىنشى ورىنعا قويۋىمىز قاجەت. قاڭتار وقيعاسى كەزىندە قاسىرەتكە تاپ بولعان وتباسىلاردىڭ جان جاراسى تاياۋ ۋاقىتتا جازىلا قويماس. سونىمەن قاتار ەل تىنىشتىعىن قورعاپ، الدىڭعى شەپتە بولعان، ءبىرقاتارى ءوز جانىن قيۋعا دەيىن بارعان باتىرلارىمىزدى ۇمىتپاۋ ءلازىم. ەڭ باستىسى، ەلدىگىمىزدى مىعىم ۇستاپ، ارمان-ماقساتىمىزدى ءبىر ارناعا توعىستىرىپ، بەرەكە- بىرلىگىمىزدى بەرىك ساقتاي بىلسەك، ءبىزدى ەشقانداي جاۋ الا المايدى دەپ بىلەمىن.

- اڭگىمەڭە راقمەت!

اۆتور

عايساعالي سەيتاق

سوڭعى جاڭالىقتار