قاڭتار وقيعاسى كەزىندە «ديكي ارماننىڭ» توبى قانشا ادامدى قاماۋدا ۇستاعان
الماتى. KAZINFORM - سوت بارىسىندا ارمان جۇماگەلديەۆ باستاعان توپ 2022 -جىلى قاڭتار ايى كەزىندە جاساعان قىلمىستارعا قاتىستى تولىق دەرەكتەر ايتىلدى.

الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ارمان جۇماگەلدييەۆكە، الماتى ءماسليحاتىنىڭ بۇرىنعى دەپۋتاتى قايرات قۇدايبەرگەنگە، ۇقك بەسىنشى دەپارتامەنتىنىڭ بۇرىنعى باسشىسى رۋسلان ىسقاقوۆقا قاتىستى سوت ۇكىمى شىقتى.
سوت مالىمەتىنە سايكەس، 2016 -جىلى ق ر ۇ ق ك 5- دەپارتامەنتى باستىعىنىڭ ورىنباسارى قىزمەتىن اتقارعان ىسقاقوۆ جۇماگەلديەۆتى ۇلتتىق قاۋىپسىزدىك ورگاندارى تاراپىنان قامقورلىققا الۋعا ۋادە بەرگەن. بۇل كەلىسىمنەن كەيىن جۇماگەلديەۆ قازاقستان اۋماعىندا جانە ودان تىس جەرلەردە قىلمىستىق ۇيىمدى قالىپتاستىرۋعا كىرىسكەن.
جۇماگەلدييەۆ قاڭتار وقيعاسىنان بۇرىن الدىن الا 2021 -جىلى جەلتوقسان ايىندا قازاقستانعا كەلگەن. ال 2022 -جىلى قاڭتار ايىندا جاپپاي تارتىپسىزدىك باستالعاندا «قازاقستان» قوناق ۇيىندە شتاب ۇيىمداستىرعان قايرات قۇدايبەرگەننەن شاقىرتۋ الىپ، سوندا قارۋلى توپتىڭ ءىس- ارەكەتتەرىن باسقارىپ وتىرعان.
سوت انىقتاعانداي، 2022 -جىلى 5-قاڭتار كۇنى جۇماگەلدييەۆ باستاعان توپ رەسپۋبليكا الاڭىنا ەكى رەت شىققان. ولار بيلىككە تالاپ قويۋ ءۇشىن «حالىقتىق كەڭەس» تۇرىندەگى كونستيتۋتسيالىق ەمەس ورگان قۇرۋدى جوسپارلاعان. كەيىن جۇماگەلديەۆ جاپپاي تارتىپسىزدىككە قاتىسۋشىلار سانىن كوبەيتۋ ءۇشىن الماتى مەن شىمكەنت قالالارىنان ءوز بانداسىنىڭ ادامدارىن شاقىرعان.
2022 -جىلدىڭ 5-قاڭتارىنان 6-سىنا قاراعان ءتۇنى ۇ ق ك باسشىلىعى ۇستالعاننان كەيىن ىسقاقوۆ جاپپاي تارتىپسىزدىك بويىنشا جوسپاردىڭ ساتسىزدىگىن ءتۇسىنىپ، قىلمىس ىزدەرىن جاسىرۋعا كىرىسەدى. الماتى قالاسىنداعى جاعدايدى تۇراقتاندىرۋ سىلتاۋىمەن ول جۇماعەلديەۆكە ادامداردى ۇرلاپ، ولاردى «قازاقستان» جانە «The Ritz Carlton Almaty» قوناق ۇيلەرىندە ۇستاۋعا نۇسقاۋ بەردى.
وسىلايشا باندا مۇشەلەرى بارلىعى 34 جابىرلەنۋشىنى ۇرلاپ، ۇرىپ-سوققان. مىسالى، «The Ritz Carlton Almaty» قوناق ءۇيىنىڭ جانىندا جۇماگەلديەۆتىڭ قىلمىستىق توبىنىڭ 15 مۇشەسى ءوتىپ بارا جاتقان كولىكتى توقتاتىپ، ونداعى 5 ازاماتتى ۇستاپ العان. كەيىن جابىرلەنۋشىلەردى قوناق ءۇيدىڭ جەراستى پاركينگىنە ماجبۇرلەپ اپارىپ، ءىش كيىمدەرى قالعانشا شەشىندىرىپ، ۇرىپ-سوققان. باندا مۇشەلەرى جابىرلەنۋشىلەردى جاپپاي تارتىپسىزدىكتەر مەن بوتەننىڭ مۇلكىن ۇرلاۋعا قاتىسقانىن مويىنداۋعا ماجبۇرلەگەن.
سونىمەن قاتار جۇماگەلديەۆ ءوزى ۇيىمداستىرعان قىلمىستاردىڭ ىزدەرىن جاسىرۋ ءۇشىن الماتى قالاسى ت ج د ءورت ءسوندىرۋ ماشيناسىن قايتارىپ، 12 قالالىق اۋرۋحانانى كۇزەتكە العان، سونداي-اق الماتى قالاسىنىڭ تۇرعىندارىنا ازىق-تۇلىك تاراتۋعا باستاماشى بولدى.
- ءىس قاتىسۋشىلارىنىڭ اتالعان قىلمىستىق ارەكەتتەرى كۋاگەرلەردىڭ تۇراقتى ايعاقتارىمەن، ساراپتامالارمەن، سوتتا زەرتتەلگەن بەينە دالەلدەمەلەرمەن راستالادى، - دەپ حابارلادى سوتتان.
سوت ۇكىمىمەن جۇماگەلديەۆ ق ر ق ك-نىڭ 262-بابى 1-بولىگى، 268-بابى 1-بولىگى، 272-بابى 1-بولىگى، 272-بابى 2-بولىگى، 28-بابى 3-بولىگى، 125-بابى 3-بولىگى، 1-تارماعى، 126-بابى 3-بولىگى، 1-تارماعى بويىنشا كىنالى دەپ تانىلىپ، وعان 20 جىلعا باس بوستاندىعىنان ايىرۋ جازاسى تاعايىندالدى.
ر. ىسقاقوۆ ق ر ق ك-نىڭ 262-بابى 3-بولىگى، 272-بابى 1-بولىگى، 362-بابى 4-بولىگى، 3-تارماعى، 28-بابى 3-بولىگى، 125-بابى 3-بولىگى، 1-تارماعى، 28-بابى 3-بولىگى، 126-بابى 3-بولىگى 1-تارماعى، 268-بابى 3-بولىگى بويىنشا كىنالى دەپ تانىلىپ، وعان 15,6 جىلعا باس بوستاندىعىنان ايىرۋ جازاسى تاعايىندالدى.
ق. قۇدايبەرگەن ق ر ق ك-نىڭ 272-بابى 1,2-بولىكتەرى، 126-بابى 2-بولىگى، 1 جانە 7-تارماقتارى بويىنشا كىنالى دەپ تانىلىپ، وعان 8 جىل باس بوستاندىعىنان ايىرۋ جازاسى تاعايىندالدى.
جاپپاي تارتىپسىزدىكتەردىڭ باسقا قاتىسۋشىلارىنا - جۇماگەلديەۆتىڭ قىلمىستىق توبىنىڭ مۇشەلەرىنە (بارلىعى 13 ادام) 10 جىلدان 15,5 جىلعا دەيىن باس بوستاندىعىنان ايىرۋ جازاسى تاعايىندالدى.
قىلمىستىق توپتىڭ قۇرامىنا كىرمەيتىن جاپپاي تارتىپسىزدىكتەردىڭ باسقا قاتىسۋشىلارىنا 1,5 جىلدان 7 جىلعا دەيىن باس بوستاندىعىنان ايىرۋ جازاسى تاعايىندالدى.
ۇكىم زاڭدى كۇشىنە ەنگەن جوق.
ەسكە سالايىق، 2023 -جىلى قىركۇيەك ايىندا الماتى ماڭىنداعى №72-تۇزەۋ مەكەمەسىنىڭ تەرگەۋ يزولياتورىندا ءماسليحاتتىڭ ەكس-دەپۋتاتى قايرات قۇدايبەرگەن مەن ارمان جۇماگەلديەۆكە قاتىستى سوت پروتسەسى باستالعان بولاتىن.
اۆتور
دوسبول اتاجان