قاتار مەن قازاقستان قاتىناسى قارقىندى دامىپ كەلەدى - شەيح حاليف بين دجاسيم ءال ءتاني
دوحا. KAZINFORM - قاتار ساۋدا-ونەركاسىپ پالاتاسىنىڭ ءتوراعاسى شەيح حاليف بين دجاسيم ءال ءتانيدىڭ ايتۋىنشا، قازاقستانمەن قارىم-قاتىناس قارقىندى دامىپ كەلەدى.
«قاتار ءامىرى شەيح دجاسيم بەن مۇحاممەد بەن ءتاميدىڭ قازاقستانعا سوڭعى ساپارىنان كەيىن قاتار مەن قازاقستان قاتىناسى قارقىندى دامىپ كەلەدى. ءوزارا تۇسىنىستىك تۋرالى كوپتەگەن مەموراندۋمعا قول قويىلدى. بۇگىنگى كەزدەسۋدە وزگە دە ينۆەستيتسيالىق كەلىسىمدەر راسىمدەلدى»، - دەدى قاتار ساۋدا-ونەركاسىپ پالاتاسىنىڭ ءتوراعاسى.
ونىڭ اتاپ وتۋىنشە، قاتار مەن قازاقستان اراسىنداعى قاتىناس وتە جەدەل دامۋ ۇستىندە. بۇل ورايدا ول قازاقستانداعى قاتارلىق ينۆەستيتسيانىڭ مولىنان بولعانىن، ال قاتارعا قازاقستاندىق ينۆەستورلار لەگىنىڭ ارتقانىن قالايتىندىعىن ايتادى.
«بۇگىن تاڭەرتەڭ قاتار مەن قازاقستان ۇكىمەتتەرىنىڭ اراسىندا مۇناي مەن گازدى، قۇبىر جەلىلەرىن، ەلەكتر ستانسالارى مەن اۋرۋحانالاردى قوسا العاندا كوپتەگەن سەكتورعا ينۆەستيتسيا تۋرالى كەلىسىمنىڭ راسىمدەلگەنىنە كۋا بولدىق»، - دەدى ول.
سپيكەردىڭ اتاپ وتۋىنشە، مۇنىڭ ءبارى ەكى ەل اراسىنداعى ينۆەستيتسيالىق قاتىناستاردىڭ ارتۋىنا سەپتىگىن تيگىزەدى. سونىمەن قاتار شەيح قازاقستاننىڭ قاتارعا دوستىق پەيىلدەگى ۇلكەن مەملەكەت ەكەندىگىنە، اۋىل شارۋاشىلىعى، ونەركاسىپ، مۇناي-گاز سەكتورى سالالارىنداعى ىنتىماقتاستىققا مول مۇمكىندىك بار ەكەندىگىنە ايرىقشا نازار اۋدارتتى.
«بۇگىن تاڭەرتەڭ قول قويىلعان بارلىق مەموراندۋم ىنتىماقتاستىعىمىزعا نەگىز قالايدى. ءتىپتى، ونىڭ كەيبىرى بۇگىندە قولدانىستاعى كەلىسىمشارت تا سانالادى. تاياۋ جىلداردىڭ ىشىندە ونىڭ ناتيجەسىن كورەتىندىگىمىزگە ۇمىتتەنەمىز. مۇنان بولەك، بۇل كەلىسىمدەردىڭ تاياۋ ۋاقىتتا جۇزەگە اسىرىلاتىندىعىنان ۇمىتتەنەمىن»، - دەدى حاليف بين دجاسيم ءال ءتاني.
ايتا كەتسەك، پرەزيدەنت قاسىم-جومارت توقايەۆ پەن قاتار ءامىرى ءبىرقاتار قۇجاتقا قول قويدى.
