قاتار حالىقارالىق ازاماتتىق اۆياتسيا ۇيىمىنا رەسمي حات جولدادى
استانا. KAZINFORM - قاتار 9- قىركۇيەكتە ءيزرايلدىڭ دوحا قالاسىنا جاساعان شابۋىلىنا بايلانىستى ازاماتتىق اۆياتسيا جونىندەگى حالىقارالىق ۇيىمعا (ICAO) رەسمي حات جولداعانىن مالىمدەدى، دەپ حابارلايدى انادولى.
گازا سەكتورىندا ءبىتىم جانە تۇتقىندارمەن الماسۋ تۋرالى كەلىسسوزدەرگە دەلدال بولعان قاتارعا يزرايل ارمياسى اۋەدەن سوققى جاساپ، 6 ادام قازا تاپقان ەدى. وسى وقيعاعا بايلانىستى دوحا ۇكىمەتى حالىقارالىق دەڭگەيدە ءتيىستى جۇمىستار جۇرگىزىپ جاتىر.
قاتاردىڭ رەسمي اقپارات اگەنتتىگى QNA حابارلاعانداي، دوحا ۇكىمەتى ICAO كەڭەسىنىڭ ءتوراعاسىنا رەسمي حات جولداعان.
ۇيىمداعى قاتاردىڭ تۇراقتى وكىلى يسا ابدۋللا ءال- ماليكي جولداعان حاتتا 9-قىركۇيەكتەگى ءيزرايلدىڭ شابۋىلى قاتاردىڭ ەگەمەندىگى مەن ازاماتتىق اۆياتسيا جونىندەگى حالىقارالىق چيكاگو كونۆەنتسياسىنىڭ ورەسكەل بۇزىلۋى ەكەنى ايتىلعان. سونىمەن قاتار، قاتار حالىقارالىق قۇقىق اياسىندا بارلىق قۇقىقتارىن ساقتاپ قالاتىنىن مالىمدەگەن.
ءيزرايلدىڭ قاتارعا جاساعان شابۋىلى سالدارىنان 6 ادام قازا تاپتى
9-قىركۇيەكتە يزرايل ارمياسى دوحا قالاسىنداعى حاماس- تىڭ كەلىسسوز جۇرگىزۋشى دەلەگاتسياسى ورنالاسقان عيماراتقا اۋە شابۋىلىن جاساعان.
اۋە سوققىسىنان كەيىن حاماس جەتەكشىلەرى امان قالعانىمەن، 6 ادام قازا تاپتى. ولاردىڭ ىشىندە حاماس ساياسي بيۋروسىنىڭ مۇشەسى حاليل ءال- حايەنىڭ ۇلى، حاماس ۇيىمىنىڭ 4 مۇشەسى جانە ءبىر كاتارلىق پوليتسيا قىزمەتكەرى بار.
10- قىركۇيەكتە يزرايل پرەمەر- ءمينيسترى بينيامين نەتانياحۋ مالىمدەمە جاساپ، قاتارعا جاڭا شابۋىلدار بولاتىنىن ەسكەرتتى.
- نەمەسە ولاردى ەلدەن شىعاراسىڭدار، نە ادىلدىككە تارتاسىڭدار. ەگەر بۇنى وزدەرىڭ ىستەمەسەڭدەر، ءبىز ىستەيمىز، - دەدى ول.
بۇعان دەيىن قاتار يزرايلدىڭ دوحا قالاسىنا جاساعان سوققىسىنا قارسى ارەكەت شارالارىن تالقىلاۋ ءۇشىن شۇعىل اراب- يسلام سامميتىن وتكىزەتىنى حابارلاندى.
