قاتار ا ق ش پەن يران اراسىنداعى كەلىسسوزدەردە ىلگەرىلەۋ بارىن ايتتى
استانا. KAZINFORM - قاتار ا ق ش پەن يران اراسىنداعى قاقتىعىستى رەتتەۋ جونىندەگى ديپلوماتيالىق ارەكەتتەردە ىلگەرىلەۋشىلىك بارىن مالىمدەدى.
بۇل تۋرالى ەلدىڭ سىرتقى ىستەر مينيسترلىگى قاتار پرەمەر-ءمينيسترىنىڭ اق ۇيدە ا ق ش پرەزيدەنتى دونالد ترامپپەن كەزدەسۋىنەن كەيىن حابارلادى، دەپ جازادى Kazinform اگەنتتىگى Euronews كە سىلتەمە جاساپ.
قاتار پرەمەر- ءمينيسترى ءارى سىرتقى ىستەر ءمينيسترى شەيح مۇحاممەد بين ابدۋلراحمان ءال تاني 9-قاراشادا ۆاشينگتوندا ا ق ش پرەزيدەنتى دونالد ترامپپەن كەلىسسوز وتكىزدى.
قاتار سىرتقى ىستەر مينيسترلىگىنىڭ ب ا ق جانە كوممۋنيكاتسيالار دەپارتامەنتىنىڭ ديرەكتورى يبراگيم بين سۇلتان ءال حاشيميدىڭ ايتۋىنشا، كەزدەسۋ جاقسى اتموسفەرادا ءوتىپ، كەلىسسوز ۇدەرىسىن ىلگەرىلەتۋگە باعىتتالعان.
- ازىرشە كەلىسىمگە قول جەتكىزۋگە قانشالىقتى جاقىن نەمەسە الىس ەكەنىمىزدى ايتا المايمىز. دەگەنمەن ارااعايىندىق ارەكەتتەر جالعاسىپ جاتىر. ەكى تاراپ تا ماسەلەنى ديپلوماتيالىق جولمەن شەشۋگە قاتىستى وڭ ۇستانىم ءبىلدىرىپ وتىر،- دەدى قاتار سىرتقى ساياسي ۆەدومستۆوسىنىڭ وكىلى.
ول قاتار پرەمەر-ءمينيسترىنىڭ ۆاشينگتونعا ساپارىنا دەيىن ەل وكىلدەرى تەگەراندا كەلىسسوزدەر جۇرگىزىپ، ايماقتاعى باسقا مەملەكەتتەردىڭ ۇكىمەتتەرىمەن دە كونسۋلتاتسيالار وتكىزگەنىن ايتتى.
ال دونالد ترامپ پارسى شىعاناعى ەلدەرى، سونىڭ ىشىندە قاتار مەن ساۋد ارابياسى، يرانعا جاڭا سوققى جاساماۋعا ۇندەگەنىن مالىمدەدى. ا ق ش پرەزيدەنتى ازىرشە جاڭا شابۋىلدار جاساماۋعا كەلىسكەنىن، ءبىراق تەڭىز بلوكاداسىن ساقتاپ قالاتىنىن ايتتى.
ءوز كەزەگىندە تەگەران ا ق ش- تىڭ سوققىلارىن توقتاتۋ، ورمۋز بۇعازىنداعى يران پورتتارىنىڭ بلوكاداسىن الىپ تاستاۋ جانە سانكتسيالاردىڭ ءبىر بولىگىن جويۋ شارتىمەن ەكى كۇن ىشىندە كەلىسسوزدەردى قايتا باستاۋعا ۇسىنىس جاسادى. ال يراننىڭ يادرولىق باعدارلاماسىنا قاتىستى ماسەلەنى كەيىنىرەك تالقىلاۋ جوسپارلانىپ وتىر.
قاتار سىرتقى ىستەر مينيسترلىگىنىڭ وكىلى پارسى شىعاناعى ەلدەرىنەن مۇناي مەن سۇيىتىلعان تابيعي گاز ەكسپورتتاۋدىڭ نەگىزگى باعىتتارىنىڭ ءبىرى سانالاتىن ورمۋز بۇعازى ارقىلى كەمە قاتىناسىن مۇمكىندىگىنشە تەزىرەك قالپىنا كەلتىرۋ قاجەت ەكەنىن دە اتاپ ءوتتى.
تاراپتاردان وڭ سيپاتتاعى مالىمدەمەلەر بولعانىمەن، ۆاشينگتون مەن تەگەراننىڭ كەلىسىمگە كەلۋ مەرزىمى ازىرشە بەلگىسىز.
ەسكە سالايىق، بۇعان دەيىن ا ق ش پرەزيدەنتى دونالد ترامپ يرانعا قاتىستى اسكەري قىسىمدى ساقتاۋعا جانە قاجەت بولعان جاعدايدا سوققىلاردى قايتا باستاۋعا دايىن ەكەنىن مالىمدەگەن ەدى.
