قاسىم-جومارت توقايەۆ سۋپەركومپيۋتەردى ىسكە قوسۋ راسىمىنە قاتىستى
استانا. KAZINFORM مەملەكەت باسشىسى Alemcloud ۇلتتىق سۋپەركومپيۋتەر ورتالىعىنا بارىپ، NVIDIA H200 گرافيكالىق پروتسەسسورلارى بازاسىندا جاساقتالعان سۋپەركومپيۋتەردى ىسكە قوسۋ راسىمىنە قاتىستى، دەپ حابارلايدى اقوردانىڭ باسپا ءسوز قىزمەتى.
جاڭا داتا - ورتالىقتاعى جۇيەنى سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى حالىقارالىق سەرىكتەستەرمەن بىرگە ورناتىپ، پايدالانۋعا بەردى.
جاڭا سۋپەركومپيۋتەر كلاستەرى FP8 فورماتىندا ەسەپتەۋ ادىستەمەسى بويىنشا 2 ەكزافلوپسقا دەيىنگى ونىمدىلىكتى قامتاماسىز ەتە الادى. ەسەپتەۋ قۋاتى جاعىنان ورتالىق ازيا وڭىرىندەگى ەڭ ۇزدىگى سانالادى.
قاسىم-جومارت توقايەۆ سۋپەركومپيۋتەردىڭ ىسكە قوسىلۋى ەلىمىزدەگى نەگىزگى سالالاردى سيفرلاندىراتىن ماڭىزدى قادام ەكەنىن اتاپ ءوتتى. بۇل قازاقستاننىڭ سيفرلىق تەحنولوگيالاردى دامىتۋدا ايتارلىقتاي وركەندەۋىنە ىقپال ەتەدى.
سۋپەركومپيۋتەردىڭ ەسەپتەۋ قۋاتىن نەيروجەلى شەشىمدەرىن ازىرلەۋمەن اينالىساتىن ستارتاپتار، ۋنيۆەرسيتەتتەر مەن عىلىمي ورتالىقتار، سونداي-اق مەملەكەتتىك مەكەمەلەر مەن جەكە كومپانيالار پايدالانا الادى.
ەسكە سالساق، وتكەن جىلى قازاقستان قۋاتى كۇشتى سۋپەركومپيۋتەر قۇرۋعا كىرىسكەن بولاتىن.
سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى سۋپەركومپيۋتەرگە قاجەت جابدىقتاردى جەتكىزۋ پروتسەسىنە تۇسىنىك بەرگەن ەدى.
