قاسىم-جومارت توقايەۆ سلوۆەنيامەن قانداي سالالاردا تىڭ جوبالارلار جۇزەگە اسىرىلاتىندىعىن اتادى

استانا. KAZINFORM - قازاقستان-سلوۆەنيا ۇكىمەتارالىق كوميسسيانىڭ قىزمەتى جاڭا دەڭگەيگە كوتەرىلمەك. بۇل تۋرالى اقوردادا ەلىمىزگە رەسمي ساپارمەن كەلگەن سلوۆەنيا پرەزيدەنتى ناتاشا پيرتس-مۋسارمەن كەلىسسوزدەردەن كەيىنگى ب ا ق وكىلدەرىنە ارنالعان بىرلەسكەن مالىمدەمە بارىسىندا مەملەكەت باسشىسى قاسىم-جومارت توقايەۆ اتتى.

- سلوۆەنيا - قازاقستاننىڭ ەۋروپا وداعىنداعى سەنىمدى، ماڭىزدى سەرىكتەسى. ەكى ەلدىڭ قارىم-قاتىناسى دوستىق جانە ءوزارا سىيلاستىق رۋحىندا نىعايىپ كەلە جاتىر. بىلتىر سلوۆەنيا استاناسى - ليۋبليانا قالاسىندا قازاقستان ەلشىلىگىنىڭ اشىلۋى سونىڭ ايقىن دالەلى. مەن مۇنى ىقپالداستىعىمىزدى دامىتۋ جولىنداعى ماڭىزدى قادام دەپ سانايمىن. قازاقستان ەكى ەل اراسىنداعى دوستىقتى ودان ارى تەرەڭدەتۋگە مۇددەلى. سوندىقتان بۇل ساپاردىڭ ءمان-ماڭىزى ايرىقشا، - دەدى مەملەكەت باسشىسى.

قاسىم-جومارت توقايەۆ پرەزيدەنت پيرتس-مۋسار حانىممەن مازمۇندى ءارى جەمىستى كەلىسسوز جۇرگىزگەندىگىن باسا ايتتى.

- قازاق-سلوۆەن ىنتىماقتاستىعىنىڭ اياسىن كەڭەيتۋ جولىن تالقىلادىق. ناقتى كەلىسىمدەرگە قول جەتكىزدىك. بىرلەسكەن مالىمدەمەنى قابىلدادىق. سونداي-اق بۇگىن ءبىرقاتار ۇكىمەتارالىق جانە مەكەمەارالىق كەلىسىم جاسالدى. سونىڭ ىشىندە دەنساۋلىق ساقتاۋ، تۋريزم، ءبىلىم بەرۋ سالاسىنا قاتىستى ماڭىزدى قۇجاتتار بار. بۇل كەلىسىمدەردى ءتيىمدى ىسكە اسىرۋ ارقىلى ەكى ەلدىڭ ىنتىماقتاستىعىن جانداندىرا تۇسەمىز دەپ سەنەمىن، - دەدى پرەزيدەنت.

مەملەكەت باسشىسى ەكىجاقتى قاتىناستىڭ وزەگى - ساۋدا-ەكونوميكالىق جانە ينۆەستيتسيالىق بايلانىستاردى ارتتىرۋعا كەلىسكەندىكتەرىن اتاپ ءوتتى.

- قازىر ءبىز فارماتسيەۆتيكا، جاڭارتىلاتىن ەنەرگيا، ينجەنەريا، تەلەكوممۋنيكاتسيا سالاسىندا ماڭىزدى جوبالالاردى جۇزەگە اسىرىپ جاتىرمىز. ەلىمىزدە وسى سالالاردا 20 عا جۋىق سلوۆەن كومپانياسى تابىستى جۇمىس ىستەۋدە. ەكونوميكالىق بايلانىستاردىڭ اۋقىمىن ودان ارى كەڭەيتۋ ماڭىزدى. وسى ورايدا تسيفرلاندىرۋ جانە يننوۆاتسيا، جاسىل ەنەرگەتيكا، اتوم ونەركاسىبى، دەنساۋلىق ساقتاۋ، تۋريزم سالاسىندا تىڭ جوبالاردى جۇزەگە اسىرۋعا كەلىستىك. قولدا بار مۇمكىندىكتى ءتيىمدى پايدالانۋ ءۇشىن ۇكىمەتارالىق كوميسسيانىڭ جۇمىسىن جانداندىرىپ، ونىڭ قىزمەتىن جاڭا دەڭگەيگە كوتەرۋگە شاقىردىم، - دەدى قاسىم-جومارت توقايەۆ.

بۇعان دەيىن مەملەكەت باسشىسى قازاقستان-سلوۆەنيا بيزنەس كەڭەسىن قۇرۋدى ۇسىنعان ەدى.