قاسىم-جومارت توقايەۆ: رەسەيمەن ىنتىماقتاستىعىمىز ءورشىل باعىتتا دامىپ كەلەدى
استانا. KAZINFORM — پرەزيدەنت قاسىم-جومارت توقايەۆ رەسەي باسشىسى ۆلاديمير پۋتينمەن كەڭەيتىلگەن قۇرامداعى كەلىسسوزدە ءوزارا ىنتىماقتاستىقتىڭ ءورشىل باعىتتان اينىماۋى ءۇشىن نە قاجەت ەكەنىن ايتتى.
«بۇگىن ءبىرقاتار كەلىسىم مەن دەكلاراتسياعا قول قويىلىپ، ورتاق مالىمدەمەلەر ايتىلادى. مۇنىڭ ءبارى وتە ماڭىزدى. ىنتىماقتاستىعىمىز ءورشىل باعىتتا دامىپ كەلە جاتقانىن، وسى باعىتىنان اينىمايتىنداي جولعا تۇسكەنىن ايتقىم كەلەدى. ارينە، ءبىزدىڭ مىندەتىمىز، ىنتىماقتاستىقتىڭ وسى قارقىنىن باسەڭدەتپەۋ دەپ تۇسىنەمىن. ەكى ەل اراسىنداعى ساۋدا-ساتتىق ءساتتى دامۋ ءۇشىن ينۆەستيتسيالىق ىنتىماقتاستىق تەرەڭدەي تۇسكەنى كەرەك. سونداي-اق گۋمانيتارلىق جانە ءبىلىم بەرۋ سالاسىنداعى بايلانىستاردىڭ ءورشىل باعىتتا دامىعانى ماڭىزدى»، - دەدى قاسىم-جومارت توقايەۆ.
مەملەكەت باسشىسى رەسەي پرەزيدەنتىنىڭ ەكى اراداعى ساۋدا اينالىمى تۋرالى ايتقان مالىمەتىنە توقتالدى.
«شىنىمەن دە ساۋدا كولەمى ارتىپ كەلەدى. ونىڭ كولەمىن 30 ميلليارد دوللارلىق مەجەگە جەتۋدىڭ جاقسى مۇمكىندىكتەرى بار. ينۆەستيتسيالىق ىنتىماقتاستىق تۋرالى ايتساق، بۇگىندە جالپى ينۆەستيتسيا كولەمى 18,3 ميلليارد دوللار بولاتىن 93 بىرلەسكەن جوبا جۇزەگە استى. سونىڭ ناتيجەسىندە قازاقستاندا 22 مىڭنان استام جاڭا جۇمىس ورنى اشىلدى. الداعى ۋاقىتتا شامامەن قۇنى 29,5 ميلليارد دوللار بولاتىن جانە 20 مىڭنان استام جۇمىس ورنىن قۇرۋعا مۇمكىندىك بەرەتىن 49 جوبانى قولعا الۋدى جوسپارلاپ وتىرمىز»، - دەدى پرەزيدەنت.
