قاسىم- جومارت توقايەۆ: قۇمارپازدىق -بەيبىت كۇندە ەلدىڭ شىرقىن بۇزىپ جاتقان قاتەر

استانا. KAZINFORM - "لۋدومانيا - بەيبىت كۇندە ەلدىڭ شىرقىن بۇزىپ جاتقان قاتەر. سونىڭ كەسىرىنەن تالاي شاڭىراق شايقالدى. تالاي ازامات زاڭ بۇزىپ، قىلمىسقا ۇرىندى".

بۇل تۋرالى مەملەكەت باسشىسى قاسىم- جومارت توقايەۆ ۇلتتىق قۇرىلتايدىڭ ءۇشىنشى وتىرىسىنداعى سوزىندە ايتتى، دەپ حابارلايدى اقوردانىڭ باسپا ءسوز قىزمەتى.

«مەن بىلتىرعى قۇرىلتايدا بالالار مەن جاستاردىڭ دەنساۋلىعىنا، ياعني تۇتاس ۇلتتىڭ بولاشاعىنا وراسان زور زيان كەلتىرىپ جاتقان «ۆەيپتەردىڭ» تارالۋىنا توسقاۋىل قويۋ ءۇشىن ناقتى شارالار قابىلداۋ قاجەتتىگىن ايتتىم. قازىر پارلامەنتتە ۆەيپتەردى ەلگە اكەلگەن، ونى وندىرگەن جانە تاراتقان ادامداردى قىلمىستىق جاۋاپكەرشىلىككە تارتۋدى كوزدەيتىن زاڭ جوباسى قارالىپ جاتىر. بۇل قادام بۇگىندە سانگە اينالعان وسى ءبىر قاۋىپتى كەسەلدىڭ تارالۋىن ەداۋىر شەكتەپ، بەتىن قايتاراتىنىنا سەنىمدىمىن.

سونداي-اق اقپارات قۇرالدارى ارقىلى جان-جاقتى ءتۇسىندىرۋ جۇمىسى جۇرگىزىلۋگە ءتيىس. بۇل - ۇلت ساۋلىعىنا دا، ەلىمىزدىڭ ابىروي-بەدەلىنە دە كەسىرىن تيگىزەتىن ادەت. ءبىز وركەنيەتتى ەل بولامىز دەسەك، ودان تولىق ارىلۋىمىز كەرەك.

سول سياقتى تاعى ءبىر قاۋىپتى كەسەل - لۋدومانيا، ياعني قۇمارپازدىق. كەيبىر مالىمەتتەرگە قاراساق، 400 مىڭعا جۋىق ازامات - بۋكمەكەرلىك كەڭسەلەر مەن كازينولاردىڭ تۇراقتى كليەنتى. بۇل - تۇتاس ءبىر قالانىڭ حالىق سانىنا پارا-پار كورسەتكىش. شىن مانىندە، لۋدومانيا - بەيبىت كۇندە ەلدىڭ شىرقىن بۇزىپ جاتقان قاتەر. سونىڭ كەسىرىنەن تالاي شاڭىراق شايقالدى. تالاي ازامات زاڭ بۇزىپ، قىلمىسقا ۇرىندى. قۇمار ويىن ءۇشىن قارىزعا باتىپ، وزىنە قول جۇمساعان جاندار تۋرالى حابارلار، وكىنىشكە قاراي، كۇن سايىن تاراپ جاتادى. بۇل دەرت جاس ۇرپاققا وتە ۇلكەن زيان كەلتىرەدى. ونلاين-ويىندار بالالاردىڭ كۇندەلىكتى ەرمەگىنە اينالىپ بارادى. قۇزىرلى ورگاندار بىلتىر ينتەرنەت-كازينونىڭ بەلگىسى بار 4 مىڭنان استام سايتتى بۇعاتتادى»، - دەدى ق ر پرەزيدەنتى.

سونداي- اق، پرەزيدەنت جاستاردىڭ قۇمار ويىنعا سالىنىپ، ارزان تابىسقا ۇمتىلۋىنا جول بەرمەۋ كەرەگىن ەسكەرتتى.

«ءبىز ناشاقورلىققا جانە ەسىرتكى بيزنەسىنە قارسى كۇرەسۋ ءۇشىن كەشەندى جوسپار قابىلدادىق. ۇكىمەت لۋدومانيامەن كۇرەسكە قاتىستى ءدال سونداي جوسپار قابىلداۋى كەرەك. قۇمارپازدىققا زاڭ جۇزىندە شەكتەۋ قويۋ قاجەت. «Amanat» پارتياسى فراكسياسىنىڭ باستاماسىمەن وسى ماسەلە بويىنشا ءتيىستى زاڭ جوباسى ازىرلەندى. پارلامەنتتە قارالىپ جاتقان سول جوبانى وسى سەسسيانىڭ سوڭىنا دەيىن قابىلداۋ قاجەت.

ءبىز جاستاردىڭ قۇمار ويىنعا سالىنىپ، ارزان تابىسقا ۇمتىلۋىنا جول بەرمەۋىمىز كەرەك. ادال ەڭبەكپەن تاپقان تابىس قانا بەرەكەلى بولادى»، - دەدى مەملەكەت باسشىسى.

اۆتور

ەربول جانات