قاسىم-جومارت توقايەۆ قازانعا باردى

قازان. KAZINFORM – ق ر پرەزيدەنتى قاسىم-جومارت توقايەۆ رەسەي فەدەراتسياسىنىڭ پرەزيدەنتى ۆلاديمير پۋتيننىڭ شاقىرۋىمەن ب ر ي ك س- كە مۇشە مەملەكەتتەر باسشىلارىنىڭ XVI سامميتىنە قاتىسۋ ءۇشىن قازان قالاسىنا جۇمىس ساپارىمەن باردى، دەپ حابارلايدى اقوردا.

ساپار اياسىندا قازاقستان پرەزيدەنتى ەكىجاقتى كەزدەسۋلەر وتكىزىپ، ب ر ي ك س- ءتىڭ «اۋتريچ» /«بريكس+» فورماتىنداعى پلەنارلىق وتىرىسىندا ءسوز سويلەيدى.

ەسكە سالساق، 22-24-قازان كۇندەرى تاتارستان استاناسىندا بريكس سامميتى وتەدى. شاراعا قاتىسۋ ءۇشىن قالاعا الەمدىك جانە وڭىرلىك دەرجاۆالاردىڭ ءبىرقاتار باسشىسى كەلدى. ب ر ي ك س سامميتىنە قاتىسۋ ءۇشىن ءۇندىستان پرەمەر-ءمينيسترى نارەندرا مودي مەن ق ح ر ءتوراعاسى شي جينپيڭ تاتارستانعا كەلدى. بۇدان بولەك وڭتۇستىك افريكا پرەزيدەنتى سيريل رامافوسا، ەفيوپيا پرەمەر ابي احمەد، برازيليا سىرتقى ىستەر ءمينيسترى ماۋرو ۆيەيرا باستاعان دەلەگاتسيا جانە مىسىر پرەزيدەنتى ابدەل فاتتاح اس-سيسي دە ات باسىن قازانعا بۇرعان.

ر ف پرەزيدەنتىنىڭ كومەكشىسى يۋري ۋشاكوۆتىڭ ايتۋىنشا، قازانداعى بريكس سامميتىنىڭ نەگىزگى تاقىرىپتارى - كوپجاقتىلىقتى نىعايتۋ، بىرلەستىكتىڭ جاڭا مۇشەلەرىنىڭ ينتەگراتسياسى، جاھاندىق كۇن ءتارتىبى، سونداي-اق ايماقتىق قاقتىعىستى رەتتەۋ. الدىن الا مالىمەت بويىنشا، شاراعا 59 مەملەكەتتەن 20 مىڭعا جۋىق دەلەگات، سونداي-اق ەكى مىڭعا جۋىق ءتىلشى قاتىسپاق.

بۇعان دەيىن برازيليا پرەزيدەنتى لۋيس يناسيۋ لۋلا دا سيلۆا 22-24-قازان كۇندەرى قازان قالاسىندا وتەتىن ب ر ي ك س سامميتىنە دەنساۋلىق جاعدايىنا بايلانىستى قاتىسپايتىنى تۋرالى جازعان بولاتىنبىز.