قاسىم-جومارت توقايەۆ: مەملەكەتكە قايتارىلعان قارجى كوپ ۇزاماي حالىقتىڭ يگىلىگىنە جۇمسالادى

مەملەكەتكە قايتارىلعان قارجى كوپ ۇزاماي حالىقتىڭ يگىلىگىنە جۇمسالاتىن بولدى، ياعني مەكتەپتەر سالىنا باستادى. بۇل تۋرالى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ جاڭاجىلدىق قۇتتىقتاۋىندا مالىمدەدى، دەپ حابارلايدى Kazinform.

«قازاقستان ستراتەگيالىق باعدارى ايقىن ەل رەتىندە تۇراقتى دامىپ كەلە جاتىر. ءبىز ىنتىماق-بىرلىكتىڭ جانە قاجىرلى ەڭبەكتىڭ ارقاسىندا اۋقىمدى ءىس-شارالار اتقاردىق. جاڭارۋ مەن جاڭعىرۋ جولىنداعى ماڭىزدى رەفورمالاردى جۇزەگە اسىردىق. وسىلايشا، مەملەكەتتىگىمىزدىڭ تۇعىرىن بەكەمدەي تۇستىك. زاڭ مەن ءتارتىپ ۇستەمدىگىن ورناتۋدى مەملەكەتتىك ساياساتتىڭ نەگىزگى باعدارى دەپ جاريالادىق.

وسى باعىتتا ناقتى شارالاردى قابىلداۋعا كىرىستىك. ءبىلىم بەرۋ جانە دەنساۋلىق ساقتاۋ سالاسىندا اۋقىمدى جوبالاردى قولعا الدىق. ادىلدىككە نەگىزدەلگەن جاڭا ەكونوميكالىق ۇلگىگە كوشە باستادىق. ياعني، حالىقتىڭ تۇرمىس ساپاسىن جاقسارتۋ ءۇشىن اسا ماڭىزدى قادام جاسادىق. شەتەلدەن ميللياردتاعان دوللار ينۆەستيتسيا تارتتىق. سونىڭ ارقاسىندا ەلىمىزگە اسا قاجەت وندىرىستەر اشىلدى. جۇمىس ورىندارى پايدا بولدى.

ەل ەكونوميكاسىنىڭ باستى قوزعاۋشى كۇشى رەتىندە شاعىن جانە ورتا بيزنەسكە جان-جاقتى قولداۋ كورسەتەتىن بولدىق. زاڭسىز الىنعان ەكونوميكالىق اكتيۆتەردى ەلگە قايتارۋ جۇمىسى جالعاسۋدا. مەملەكەتكە قايتارىلعان قارجى كوپ ۇزاماي حالىقتىڭ يگىلىگىنە جۇمسالاتىن بولدى، ياعني مەكتەپتەر سالىنا باستادى. جىلدار بويى يگەرىلمەي كەلگەن ميلليونداعان گەكتار جەر ادال شارۋالارعا بەرىلەتىن بولدى»، - دەدى مەملەكەت باسشىسى ەل حالقىنا قۇتتىقتاۋىندا.