قاسىم-جومارت توقايەۆ: ۇكىمەت پەن اكىمدەر جۇمىس ىستەۋ ءتاسىلىن تۇبەگەيلى وزگەرتۋى ءتيىس

استانا. KAZINFORM - ۇكىمەت پەن اكىمدەر جۇمىس ىستەۋ ءتاسىلىن تۇبەگەيلى وزگەرتۋى ءتيىس. بۇل تۋرالى ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ايتتى.

«الداعى مىندەتتەردى ورىنداۋ ءۇشىن ۇكىمەتكە دە، اكىمدىكتەرگە دە ءتيىستى قۇزىرەت بەرىلگەن. الايدا، بۇل مۇمكىندىكتەر كوپ جاعدايدا دۇرىس قولدانىلماي جاتادى. سونىڭ كەسىرىنەن رەفورمالاردى جۇزەگە اسىرۋ قارقىنى باسەڭدەپ كەتتى. مۇندايدى دوعارۋ كەرەك. مەملەكەتتىك ورگاندار اراسىندا ءوزارا كەلىسۋ مەن تالقىلاۋ جۇمىسى اياقتالعانشا، كەز كەلگەن باستامانىڭ نەگىزگى ءمان-ماڭىزى دا وزگەرىپ كەتەدى. بيۋروكراتيانى توقتاتۋ قاجەت، بىزگە ناقتى ناتيجە كەرەك. ۇكىمەت پەن اكىمدەر جۇمىس ىستەۋ ءتاسىلىن تۇبەگەيلى وزگەرتۋگە ءتيىس. جۇمىس بارىسىندا جۇيەلى ۇستانىم بولۋى قاجەت»، - دەدى پرەزيدەنت.

قاسىم-جومارت توقايەۆ ماسەلەنى جەدەل شەشۋمەن قاتار، ەكونوميكانىڭ ۇزاقمەرزىمدى دامۋىن قامتاماسىز ەتۋ وتە ماڭىزدى ەكەندىگىن باسا ايتتى.

«قازىرگى جاعدايدا ەكونوميكامىزدىڭ مەيلىنشە ەركىن دامۋىنا ءمان بەرۋىمىز قاجەت. ەلىمىزدى دامۋدىڭ جاڭا بەلەسىنە شىعارامىز دەسەك، بۇل جۇمىستى جەدەل جانە دايەكتى تۇردە جۇرگىزگەن ءجون. مەن بىلتىرعى جولداۋىمدا جاڭا ەكونوميكالىق ساياساتتىڭ نەگىزگى باعىتتارىن ايقىنداپ بەردىم. سوندىقتان بۇگىن مەن قازىرگى ەكونوميكالىق احۋالعا قاتىستى وزەكتى ماسەلەلەرگە توقتالامىن»، - دەدى مەملەكەت باسشىسى.