قاسىم-جومارت توقايەۆ كولىك جانە لوگيستيكا سەكتورىنداعى كەڭ مۇمكىندىكتەرگە توقتالدى

نيۋ-يورك. KAZINFORM - پرەزيدەنت امەريكانىڭ بيزنەس وكىلدەرىمەن وتكەن «دوڭگەلەك ۇستەل» وتىرىسىندا ءسوز سويلەدى. ول ترانسكاسپي حالىقارالىق كولىك باعدارىن دامىتۋدىڭ كەلەشەگى زور ەكەنىنە نازار اۋداردى.

بۇل تۋرالى اقوردانىڭ باسپا ءسوز قىزمەتى ءمالىم ەتتى.

مەملەكەت باسشىسىنىڭ سوزىنشە، Wabtec كومپانياسىمەن جاسالعان جاڭا كەلىسىم ەلىمىزدىڭ ا ق ش- پەن كولىك سالاسىنداعى ىنتىماقتاستىعىن ايتارلىقتاي نىعايتادى.

- ءبىز Wabtec كومپانياسىنىڭ ەلىمىزدەگى ماشينا جاساۋ جانە تەمىرجول كولىگى سالالارىن ىلگەرىلەتۋدەگى نەگىزگى ءرولىن جوعارى باعالايمىز. قازاقستان اتالعان كومپانيامەن سەرىكتەسە وتىرىپ، فيزيكالىق جەلىلەردى عانا ەمەس، ۇلكەن دەرەكقورعا نەگىزدەلگەن ينتەللەكتۋالدى، ينتەگراتسيالانعان كولىك دالىزدەرىن دە قۇرىپ جاتىر. بۇگىن Wabtec كومپانياسىمەن 4 ميلليارد دوللارعا جۋىق قارجىنىڭ جاڭا كەلىسىمىنە قول قويىلدى. بۇل ەلىمىزدىڭ ا ق ش- پەن كولىك سالاسىنداعى ىنتىماقتاستىعىن ايتارلىقتاي نىعايتادى. Air Astana جانە SCAT سياقتى الدىڭعى قاتارلى اۋە كومپانيالارى Boeing ۇشاقتارىن پايدالانادى. ازاماتتىق اۆياتسيا پاركىمىزدىڭ نەگىزى وسى ۇشاقتاردان قۇرالعان. ءبىز Boeing كومپانياسىمەن ىنتىماقتاستىقتى كەڭەيتۋگە جانە تاياۋ جىلدارى جاڭا ۇشاقتار الۋعا نيەتتىمىز، - دەدى قاسىم-جومارت توقايەۆ.

ايتا كەتەيىك، بۇعان دەيىن ا ق ش پرەزيدەنتى دونالد ترامپ قازاقستاننىڭ مەملەكەت باسشىسىن تاريحي كەلىسىممەن قۇتتىقتاعانىن جازعان ەدىك.