قاسىم-جومارت توقايەۆ: جۋرناليستەرگە پاتەر تابىستاۋ ءداستۇرى كەلەشەكتە تە جالعاسادى
استانا. KAZINFORM - پرەزيدەنت قاسىم-جومارت توقايەۆ ب ا ق سالاسى قىزمەتكەرلەرىن ماراپاتتاۋ راسىمىندە سويلەگەن سوزىندە ۇزدىك جۋرناليستەرگە سىيلىق تابىستاۋدى قالىپتاسقان ءداستۇر دەپ باعالايتىنىن ايتتى.
«كەز كەلگەن ەڭبەك باعالانۋعا ءتيىس. وركەنيەتتى قوعام ماسس-مەديا مايتالماندارىن ەرەكشە قادىرلەيدى. جىل سايىن ەلىمىزدە ۇزدىك جۋرناليستەرگە سىيلىقتار تابىستالادى. بۇل - قالىپتاسقان ءداستۇر. بۇگىن ورتامىزدا وسى سالادا جارتى عاسىرعا جۋىق قىزمەت اتقارعان ازاماتتار بار. ايماقتاعى جۋرناليستيكانىڭ كوشىن باستاعان تۇلعالار دا از ەمەس. وسى جيىنعا ءار وبلىستىڭ بۇقارالىق اقپارات وكىلدەرىن ارنايى شاقىردىق. ءبىر سوزبەن، بۇل جەردە ناعىز مايتالمان ماماندار وتىر. سوندىقتان مەن اقپارات سالاسىنا ەرەكشە ەڭبەك سىڭىرگەن ءبىر توپ ازاماتتى مەملەكەتتىك ناگرادامەن ماراپاتتاۋ تۋرالى شەشىم قابىلدادىم»، - دەدى قاسىم-جومارت توقايەۆ.
پرەزيدەنت جۋرناليست قاۋىمنىڭ كاسىبي مىندەتتى ابىرويمەن اتقارىپ كەلە جاتقانىن اتاپ ءوتتى.
«بىلتىردان بەرى مەرەكە قارساڭىندا جۋرناليستەرگە پاتەر كىلتىن تابىستاۋدى داستۇرگە اينالدىردىق. بۇل ءۇردىس بيىل دا، الداعى ۋاقىتتا دا جالعاسا بەرەدى»، - دەدى مەملەكەت باسشىسى.
