قاسىم-جومارت توقايەۆ حرومتاۋ جوعارى تاۋ-كەن تەحنيكالىق كوللەدجىنە باردى
اقتوبە. KAZINFORM - مەملەكەت باسشىسى قاسىم-جومارت توقايەۆ حرومتاۋ جوعارى تاۋ-كەن تەحنيكالىق كوللەدجىنە باردى.
پرەزيدەنتكە بۇل ءبىلىم وشاعى ەلىمىزدىڭ باتىس وڭىرىندەگى تاۋ-كەن سالاسىنا ماماندار دايارلايتىن جالعىز كاسىپتىك وقۋ ورنى ەكەنى باياندالدى. 1979 -جىلى نەگىزى قالانعان كوللەدجدە 1157 ستۋدەنت كەنشى، ۇڭعىلاۋشى، كەن بايىتۋشى، سلەسار، تاۋ-كەن ەلەكتر مەحانيگى، ەلەكتر مونتەرى جانە باسقا دا ماماندىقتار بويىنشا ءبىلىم الىپ جاتىر.
وقۋ ورنىنىڭ ديرەكتورى باعداشجان مولداشيەۆا مەملەكەت باسشىسىنا ءبىلىم بەرۋ ۇدەرىسىندە قولدانىلاتىن وزىق تەحنولوگيالار جونىندە مالىمەت بەردى.
اتاپ ايتقاندا، كوللەدجدە تەوريالىق ءبىلىمدى تاجىريبەمەن ۇشتاستىراتىن دۋالدى وقىتۋ جۇيەسى ەنگىزىلگەن. ستۋدەنتتەر كوللەدج اۋماعىنداعى وقۋ- شاحتا پوليگونىندا وندىرىستىك تاجىريبەدەن ءوتىپ، تەحنيكامەن جۇمىس ىستەۋدىڭ كۇردەلى ءادىس-تاسىلدەرىن مەڭگەرەدى. سونداي-اق جاتتىقتىرۋشى-سيمۋلياتورلار ارقىلى شاحتاداعى جاعدايعا بارىنشا ۇقساس ورتادا جۇمىس داعدىلارىن ۇيرەنەدى.
قاسىم-جومارت توقايەۆ كوللەدج جۇمىسىمەن تانىسقاننان سوڭ ستۋدەنتتەرمەن جانە تۇلەكتەرمەن كەزدەستى.
اڭگىمەلەسۋ بارىسىندا مەملەكەت باسشىسى دۋالدى وقىتۋ جۇيەسىنىڭ اسا قاجەت ەكەنىن جەتكىزىپ، اتالعان كوللەدجدەگى تەوريا مەن ءوندىرىستى ۇشتاستىرۋ ارقىلى جۇرگىزىلىپ كەلە جاتقان ءبىلىم بەرۋ ىسىنە جوعارى باعا بەردى.
پرەزيدەنت تاۋ-كەن سالاسى ەل ەكونوميكاسىنىڭ ماڭىزدى بولىگى ەكەنىنە توقتالدى. قاسىم- جومارت توقايەۆتىڭ ايتۋىنشا، «جۇمىسشى ماماندىقتارى جىلى» بولىپ جاريالانعان 2025 -جىلى وتاندىق ونەركاسىپتى قولداۋعا باسا نازار اۋدارىلادى.
