قاسىم-جومارت توقايەۆ: بۇل - الاش ارىستارىنىڭ ازاتتىق جولىنداعى ارپالىسى اقتالعان كۇن

Историческую роль первого президента отметил Касым-Жомарт Токаев
Фото: Фото: Акорда

 ەلىن سۇيگەن ەرلەردىڭ وتانشىلدىعى جانە ولاردىڭ ۇلت مۇددەسىنە ادالدىعى ءاردايىم كەيىنگى ۇرپاققا ۇلگى-ونەگە بولۋعا ءتيىس. بۇل تۋرالى اقوردادا رەسپۋبليكا كۇنىنەن وراي ءبىرقاتار ازاماتقا مەملەكەتتىك ناگرادالار مەن سىيلىقتار تاپسىرۋعا ارنالعان سالتاناتتى راسىمدە مەملەكەت باسشىسى قاسىم-جومارت توقايەۆ ايتتى، دەپ حابارلايدى Kazinform. 

«ەلىمىزدىڭ ەڭ باستى مەيرامى - رەسپۋبليكا كۇنى قۇتتى بولسىن! بۇل - قازاقتىڭ مەملەكەتتىلىك ءداستۇرى قايتا جاڭعىرعان تاريحي كۇن، كوك تۇرىكتەر داۋىرىنەن التىن وردا، قازاق حاندىعى زامانىنان كەلە جاتقان ەلدىگىمىز تامىرىن تارتقان كۇن. بۇل - الاش ارىستارىنىڭ ازاتتىق جولىنداعى ارپالىسى اقتالعان كۇن. حالقىمىزدا «ەگەمەن بولماي، ەل بولماس» دەگەن ءسوز بار. وسىدان 33 جىل بۇرىن تاريحي ادىلدىك ورنادى. قازاقستاننىڭ مەملەكەتتىك ەگەمەندىگى تۋرالى دەكلاراتسيا قابىلداندى. وسى ماڭىزدى قۇجات جۇرتىمىزدىڭ ازاتتىق الۋىنا جول اشتى»، - دەدى پرەزيدەنت.

مەملەكەت باسشىسى شىن مانىندە ەگەمەندىك دەكلاراتسياسىن قابىلداۋ وڭايعا سوقپاعاندىعىن باسا نازار اۋدارتتى.

«ەلىمىزدىڭ ۇلتتىق قۇرامى بىركەلكى ەمەس ەدى. سول كەزدەگى پارلامەنتتە، ياعني، جوعارعى كەڭەستە جانە بۇكىل قوعامىمىزدا ۇزاق پىكىرتالاس، قىزۋ تالقىلاۋ بولدى. قۇجاتتىڭ ءار ءسوزىن، ءار بابىن قورعاۋعا تۋرا كەلدى. ءاليحان بوكەيحان «بوستاندىققا اپاراتىن جالعىز جول ۇلتتىق ىنتىماق قانا» دەگەن. ەل اعالارى حالقىمىزدىڭ ارداقتى ۇلىنىڭ بۇل وسيەتىنە ادال بولدى. ولار جاۋاپتى ساتتە ۇيىمشىلدىقپەن ۇلت مۇددەسىن قورعاي ءبىلدى. اقجولتاي قۇجات جۇرتىمىزدىڭ تالاپ- تىلەگىنە ساي جازىلدى. وتانشىل ازاماتتاردىڭ اقىل- پاراساتىنىڭ ارقاسىندا قابىلداندى»، - دەدى قاسىم-جومارت توقايەۆ.

پرەزيدەنت ولاردىڭ سىن ساعاتتاعى باتىلدىعى ناعىز ەرلىك دەپ باعالاۋعا بولاتىندىعىن باسا ايتتى.

«ءبىز قازىر ادىلەتتى قازاقستاندى قۇرىپ جاتىرمىز. سوندىقتان وتكەن زاماننىڭ قايراتكەرلەرىنە، ولاردىڭ ەڭبەگىنە لايىقتى، ادىلەتتى باعا بەرىپ وتىرۋىمىز كەرەك. ازاتتىق جىلناماسىندا سالىق زيمانوۆ، سەرىكبولسىن ءابدىلدين، قاراتاي تۇرىسوۆ، زينايدا فەدوتوۆا، ەرىك اسانبايەۆ، ءابىش كەكىلبايەۆ، قايرات ساپارعاليەۆ، سۇلتان سارتايەۆ، وزبەكالى جانىبەكوۆ، ولجاس سۇلەيمەنوۆ، الەكساندر كنياگينين، مىرزاتاي جولداسبەكوۆ، ومىربەك بايگەلدى، قۋانىش سۇلتانوۆ، سەرگەي تەرەشەنكو جانە تاعى باسقا كوپتەگەن تۇلعانىڭ ەسىمىن قۇرمەتپەن اتاپ ءوتۋ كەرەك. ەلىن سۇيگەن ەرلەردىڭ وتانشىلدىعى جانە ولاردىڭ ۇلت مۇددەسىنە ادالدىعى ءاردايىم كەيىنگى ۇرپاققا ۇلگى- ونەگە بولۋعا ءتيىس. ءبىز تاريحي ادىلدىك جولىن بەرىك ۇستانۋىمىز كەرەك. وسى ورايدا تۇڭعىش پرەزيدەنت نۇرسۇلتان نازاربايەۆتىڭ تاريحي ءرولىن اتاپ وتكەن ءجون. سەبەبى، ول ەلىمىزدىڭ تاۋەلسىز مەملەكەت اتانىپ، تۇعىرىن بەكەمدەۋگە وراسان زور ەڭبەك ءسىڭىردى»، - دەدى مەملەكەت باسشىسى.

سوڭعى جاڭالىقتار