قاسىم-جومارت توقايەۆ: اسسامبلەيا - كەيبىر ادامدار ايتىپ جۇرگەندەي، جاساندى ۇيىم ەمەس

Ақорда
فوتو: اقوردا

استانا. KAZINFORM - اسسامبلەيا - ەل بىرلىگىن ءىس جۇزىندە ورنىقتىرا تۇسەتىن ءتيىمدى قۇرىلىم. بۇل تۋرالى مەملەكەت باسشىسى قاسىم-جومارت توقايەۆ «بىرلىك. جاسامپازدىق. ورلەۋ» تاقىرىبىمەن ءوتىپ جاتقان قازاقستان حالقى اسسامبلەياسىنىڭ كەزەكتى 33-سەسسياسىندا ايتتى.

«تاسقىن باستالعاننان بەرى قازاقستان حالقى اسسامبلەياسى بەلسەندى ءارى ۇيلەسىمدى جۇمىس ىستەپ جاتىر. وعان بۇكىل ەل كۋا. جۇرتقا جان-جاقتى كومەك بەرۋ ءۇشىن دەرەۋ اسسامبلەيانىڭ رەسپۋبليكالىق جانە ايماقتىق شتابتارى قۇرىلدى. «جۇرەكتەن جۇرەككە» دەگەن اۋقىمدى اكتسيا جۇرگىزىلىپ جاتىر. اپات ايماقتارىنا 1500 توننادان استام ازىق-تۇلىك جانە ەڭ قاجەتتى تاۋارلار جولداندى. ونىڭ جالپى سوماسى شامامەن 770 ميلليون تەڭگە بولدى. سۋ تاسقىنىمەن كۇرەسكە ەتنومادەني بىرلەستىكتەردىڭ 12 مىڭعا جۋىق وكىلى قوسىلدى. ولار قايىرىمدىلىق جانە گۋمانيتارلىق كومەك جيناۋعا جۇمىلدى. سونداي-اق جۇرتتى قاتەردەن حاباردار ەتۋگە جانە قاۋىپسىز جەرگە كوشىرۋگە اتسالىستى. مۇنىڭ ءبارى - ءوزارا جاناشىر جانە تىلەۋلەس بولۋدىڭ ايقىن كورىنىسى»، - دەدى قاسىم-جومارت توقايەۆ.

پرەزيدەنت باتىس قازاقستان، سولتۇستىك قازاقستان، قوستاناي وبلىستارىنا ارنايى بارعانىن، كەزدەسۋ كەزىندە جۇرتشىلىق اسسامبلەيا مۇشەلەرىنە زور ريزاشىلىق بىلدىرگەنىن باسا ايتتى.

«اسسامبلەيا - كەيبىر ادامدار ايتىپ جۇرگەندەي، جاساندى ۇيىم ەمەس. اسسامبلەيا - ەل بىرلىگىن ءىس جۇزىندە ورنىقتىرا تۇسەتىن ءتيىمدى قۇرىلىم. بۇگىندە بۇل - كونستيتۋتسيالىق مارتەبەسى بار ماڭىزدى قوعامدىق ورگان. اسسامبلەيا وتە اۋقىمدى قايىرىمدىلىق شارالارىن دەر كەزىندە جانە جەدەل ۇيىمداستىرىپ كەلەدى. مۇنىڭ ءبارى كوپ جىلدىق جۇيەلى جۇمىستىڭ ناتيجەسى ەكەنى ءسوزسىز. اسسامبلەيا مۇشەلەرى «قايىرىمدىلىق كەرۋەنى» جوباسى ارقىلى مۇقتاج جاندارعا ۇنەمى قولداۋ كورسەتىپ ءجۇر. بىلتىردىڭ وزىندە قۇنى 1,7 ميلليارد تەڭگەدەن اساتىن كومەك بەرىلدى. بىرلىگى مىقتى حالىقتىڭ كۇش-قۋاتى ازاماتتاردىڭ ءبىر-بىرىنە دەگەن وسىنداي قامقورلىعىنان ايقىن كورىنەدى»، - دەدى مەملەكەت باسشىسى.

اۆتور

مارلان جيەمباي

سوڭعى جاڭالىقتار