قاسىم-جومارت توقايەۆ ارمەنيا پارلامەنتىنىڭ توراعاسىمەن كەزدەستى
ەريەۆان. KAZINFORM - قازاقستان پرەزيدەنتى ەريەۆانداعى پارلامەنت عيماراتىندا ارمەنيا رەسپۋبليكاسى ۇلتتىق جينالىسىنىڭ ءتوراعاسى الەن سيمونيانمەن كەزدەسۋ وتكىزدى.
مەملەكەت باسشىسى ارمەنيا مەن قازاقستان اراسىندا تىعىز قارىم-قاتىناس ورناعانىن جانە ەكى ەلدى ورتاق تاريح پەن ەجەلگى مادەني بايلانىستار بىرىكتىرەتىنىن اتاپ ءوتتى.
پرەزيدەنتتىڭ ايتۋىنشا، پرەمەر-مينيستر نيكول پاشينيانمەن جۇرگىزىلگەن كەلىسسوزدەر بارىسىندا ساۋدا-ەكونوميكا، ينۆەستيتسيا، كولىك-لوگيستيكا سالالارىندا ماڭىزدى ۋاعدالاستىقتارعا قول جەتكىزىلگەن. قاسىم-جومارت توقايەۆ بۇل كەلىسىمدەردى زاڭنامالىق تۇرعىدان ءتيىمدى قامتاماسىز ەتۋ، ولاردىڭ جۇزەگە اسىرىلۋىنا پارلامەنتتەر تاراپىنان باقىلاۋدى كۇشەيتۋ ماسەلەسىنە ايرىقشا ءمان بەرۋ قاجەت ەكەنىنە نازار اۋداردى.
كەزدەسۋدە مەملەكەت باسشىسى ەلىمىزدە ءوزىنىڭ باستاماسىمەن اۋقىمدى ساياسي جاڭعىرۋ ۇدەرىسى جۇرگىزىلىپ جاتقانىن، وندا پارلامەنتاريزمدى دامىتۋعا ەرەكشە باسىمدىق بەرىلگەنىن ايتتى.
قازاقستان پرەزيدەنتى زاڭ شىعارۋ ورگاندارى دەڭگەيىندەگى بەلسەندى ىقپالداستىققا كوڭىلى تولاتىنىن جەتكىزدى. سونداي-اق ەكى ەلدىڭ وسىناۋ ماڭىزدى باعىتتاعى قاتىناستارىن دامىتۋدى تۇراقتى تۇردە قولداپ كەلە جاتقانى ءۇشىن ۇلتتىق جينالىس ءتوراعاسىنا ريزاشىلىق ءبىلدىردى.
الەن سيمونيان ارمەنيا مەن قازاقستان اراسىنداعى كوپجاقتى جانە ەكىجاقتى فورماتتاعى ءوزارا ىنتىماقتاستىق دەڭگەيى جوعارى ەكەنىن اتاپ ءوتتى.
سونداي-اق ول ەكى ەلدىڭ پارلامەنتارالىق پلاتفورمالارداعى ىقپالداستىعىنىڭ ماڭىزىنا ەرەكشە نازار اۋداردى.
اڭگىمەلەسۋ بارىسىندا مادەني-گۋمانيتارلىق سالاداعى ىنتىماقتاستىقتى دامىتۋ، قازاقستان مەن ارمەنيا ايماقتارى اراسىنداعى بايلانىستاردى نىعايتۋ پەرسپەكتيۆالارى قاراستىرىلدى.
