قاسىم-جومارت توقايەۆ اقوردادا پول كاگامەنى قارسى الدى

استانا. قازاقپارات - مەملەكەت باسشىسى قاسىم-جومارت توقايەۆ اقوردادا قازاقستانعا رەسمي ساپارمەن كەلگەن رۋاندا پرەزيدەنتى پول كاگامەنى قارسى الدى.

الدىمەن قاسىم-جومارت توقايەۆ پەن پول كاگامە ءبىر-بىرىنە رەسمي دەلەگاتسيا مۇشەلەرىن تانىستىردى. وسىدان كەيىن مارتەبەلى مەيماننىڭ ساپارىنا وراي سالتاناتتى راسىمدەر زالىندا ساپ تۇزەگەن قۇرمەت قاراۋىلىنىڭ باستىعى مەملەكەت باسشىلارىنا سالەمدىك بايانات بەردى. پرەزيدەنت وركەسترى ەكى ەلدىڭ مەملەكەتتىك ءانۇرانىن ورىندادى.

ءانۇرانداردى تىڭداپ بولعاننان كەيىن قاسىم-جومارت توقايەۆ پەن پول كاگامە كىلەمشە بويىمەن قازاقستان رەسپۋبليكاسىنىڭ مەملەكەتتىك تۋىنا قاراي ءجۇردى.

ونىڭ الدىنا كەلگەندە مەيمان توقتاپ، باسىن ءسال ءيىپ، ءوزىنىڭ قۇرمەتىن ءبىلدىردى. سونان سوڭ مەيمان مەن پرەزيدەنت قۇرمەتتى قاراۋىل ساپىنىڭ بويىمەن ءجۇردى. قۇرمەتتى قاراۋىل باستىعىمەن قوشتاستى.

قازىرگى ۋاقىتتا جوعارى دەڭگەيدەگى كەلىسسوز ءجۇرىپ جاتىر.

بۇعان دەيىن اقوردادا رۋاندا پرەزيدەنتىنىڭ ساپار اياسىندا ەكىجاقتى ىنتىماقتاستىقتى دامىتۋ پەرسپەكتيۆاسى تالقىلانىپ، ءبىرقاتار قۇجاتقا قول قويىلاتىندىعىن ءمالىم ەتكەن ەدى.

ايتا كەتەيىك، Kazinform ءتىلشىسى قازاقستان مەن رۋاندا پرەزيدەنتتەرى كەزدەسۋىنىڭ ءمانى مەن ءتيىمدى مۇمكىندىگىن سارالاپ كورگەن بولاتىن.