قاسىم-جومارت توقايەۆ اقوردادا قىرعىز پرەزيدەنتى سادىر جاپاروۆتى قارسى الدى

استانا. KAZINFORM - بۇگىن مەملەكەت باسشىسى قاسىم-جومارت توقايەۆ قازاقستانعا رەسمي ساپارمەن كەلگەن قىرعىزستان پرەزيدەنتى سادىر جاپاروۆتى اقوردادا كۇتىپ الدى.

كورشى ەل پرەزيدەنتىنىڭ ساپارىنا وراي سالتاناتتى راسىمدەر زالىندا قۇرمەت قاراۋىلى ساپ تۇزەپ، ونىڭ باستىعى مەملەكەت باسشىسى مەن مارتەبەلى مەيمانعا راپورت بەردى.

وسىدان كەيىن پرەزيدەنتتىك وركەستر ەكى ەلدىڭ ءانۇرانىن ورىندادى. قاسىم-جومارت توقايەۆ پەن سادىر جاپاروۆ ءبىر-بىرىنە رەسمي دەلەگاتسيا مۇشەلەرىن تانىستىردى.

بۇدان ءارى مارتەبەلى مەيمان مەن قاسىم-جومارت توقايەۆ كىلەمشە بويىمەن قازاقستان رەسپۋبليكاسىنىڭ مەملەكەتتىك تۋىنا قاراي ءجۇردى.

ونىڭ الدىنا كەلگەندە سادىر جاپاروۆ توقتاپ، باسىن ءسال ءيىپ، ءىلتيپاتىن ءبىلدىردى.

سالتاناتتى راسىمىنەن كەيىن قازاقستان مەن قىرعىزستان پرەزيدەنتتەرى شاعىن قۇرامداعى كەزدەسۋگە ءوتتى.

ساپار اياسىندا بۇگىن جوعارى دەڭگەيدە ەكىجاقتى كەلىسسوزدەر جۇرگىزىلەدى جانە ءبىرقاتار ماڭىزدى قۇجاتقا قول قويىلادى دەپ جوسپارلانىپ وتىر.

ايتا كەتەيىك، 18-ءساۋىر كۇنى مەملەكەت باسشىسى قاسىم-جومارت توقايەۆ قازاقستانعا رەسمي ساپارمەن كەلگەن قىرعىزستان پرەزيدەنتى سادىر جاپاروۆتى ەلوردا اۋەجايىندا قارسى الدى.

استانادا قاسىم-جومارت توقايەۆ پەن سادىر جاپاروۆ ەكى ەل ونەرپازدارىنىڭ گالا-كونسەرتىن تاماشالادى.

سونداي-اق، ەلوردادا قىرعىز رەسپۋبليكاسىنىڭ پرەزيدەنتى سادىر جاپاروۆتىڭ رەسمي ساپارى اياسىندا قازاقستاننىڭ مادەنيەت جانە ونەر قايراتكەرلەرىنە قىرعىزستاننىڭ مەملەكەتتىك ناگرادالارىن تاپسىرۋ ءراسىمى ءوتتى.

اۆتور

رۋسلان عابباسوۆ