قاسىم-جومارت توقايەۆ اقوردادا ۆلاديمير پۋتيندى قارسى الدى
استانا. KAZINFORM - مەملەكەت باسشىسى قاسىم-جومارت توقايەۆ اقوردادا قازاقستانعا مەملەكەتتىك ساپارمەن كەلگەن رەسەي پرەزيدەنتى ۆلاديمير پۋتيندى قارسى الدى.
قارسى الۋ ءراسىمى سالتاناتتى راسىمدەر زالىندا قۇرمەت قاراۋىلىنىڭ ساپ تۇزەۋىنەن باستالدى.
قاراۋىل باستىعى مەملەكەت باسشىسى مەن مارتەبەلى مەيمانعا بايانات بەردى. وسىدان كەيىن پرەزيدەنت وركەسترى ەكى ەلدىڭ ءانۇرانىن ورىندادى.
ودان ءارى ۆلاديمير پۋتين مەن قاسىم-جومارت توقايەۆ كىلەمشە بويىمەن قازاقستان رەسپۋبليكاسىنىڭ مەملەكەتتىك تۋىنا قاراي ءجۇردى.
ونىڭ الدىنا كەلگەندە مەيمان توقتاپ، باسىن ءيىپ، ءىلتيپات ءبىلدىردى.
بۇدان كەيىن ەكى ەل باسشىلارى قۇرمەتتى قاراۋىل ساپىنىڭ بويىمەن ءجۇرىپ ءوتتى. رەسەي پرەزيدەنتى قۇرمەتتى قاراۋىل باستىعىمەن قوشتاسىپ، ق. توقايەۆپەن كەزدەسۋگە ءوتتى.
جوعارى دەڭگەيدەگى كەلىسسوزدەردەن كەيىن مەملەكەت باسشىلارى قازاقستان مەن رەسەيدىڭ ⅹⅹءوڭىرارالىق ىنتىماقتاستىق فورۋمىنا بەينەكونفەرەنسيا رەجيمى ارقىلى قاتىسادى.
28-قاراشا كۇنى قازاقستان پرەزيدەنتى قاسىم-جومارت توقايەۆتىڭ توراعالىعىمەن ۇ ق ش ۇ ۇجىمدىق قاۋىپسىزدىك كەڭەسىنىڭ كەزەكتى سەسسياسى وتەدى. جيىندا ايماقتىق جانە حالىقارالىق قاۋىپسىزدىكتىڭ نەگىزگى ماسەلەلەرى تالقىلانادى. وتىرىس قورىتىندىسى بويىنشا ءبىرقاتار قۇجاتقا قول قويىلادى.
ايتا كەتەيىك، بۇگىن قازاقستان پرەزيدەنتى قاسىم-جومارت توقايەۆتىڭ «يزۆەستيا» گازەتىنە، ال ۆلاديمير پۋتيننىڭ «كازاحستانسكايا پراۆدا» گازەتىنە ماقالاسى شىقتى.
