«قاسىم حان» سەريالى جانە باسقا دا جوبالارعا بولىنگەن قاراجات جىمقىرىلعان بولۋى مۇمكىن

  «قاسىم حان» سەريالىنا جانە باسقا دا جوبالارعا بولىنگەن قاراجات جىمقىرىلۋى مۇمكىن. بۇل تۋرالى مادەنيەت جانە اقپارات ءمينيسترى ايدا بالايەۆا ايتتى، دەپ حابارلايدى Kazinform.

«قازاقفيلمنىڭ ءوزى زەرتتەۋ جۇرگىزدى. ولقىلىقتار بولعاننان كەيىن بارلىعى ەرتەڭ ولاردىڭ موينىنا ىلىنبەۋى كەرەك قوي. قازاقفيلم باسشىسى جاڭادان كەلدى. ازامات ساتىبالدى بەلسەندى جۇمىس ىستەپ جۇرگەن ازامات. ەرتەڭ ولقىلىقتاردىڭ بارلىعى قوردالانباۋى، بارلىعى جۇيەلى تۇردە جۇمىس ىستەۋ ءۇشىن سول زەرتتەۋ جۇمىستارىن جۇرگىزگەن. سول اۋديتتىڭ قورىتىندىسىندا قارجىلىق جەتىسپەۋشىلىك بولعان. ول پروكۋراتۋراعا بەرگەن. ول بىرنەشە جوبا. مەن بىلەتىنىم «قاسىم حان» دەگەن كينو جوبا بار. ودان دا باسقا جوبا بولۋى مۇمكىن. ونى قۇزىرەتتى ورگاندار انىقتايدى. بۇگىندە بۇل ءبىزدىڭ بولجامىمىز. ونى قۇزىرلى ورگاندار جان-جاقتى زەردەلەپ، قارجى دۇرىس يگەرىلمەگەنىن نە جىمقىرىلعانىن انىقتايدى»، - دەدى مينيستر ورتالىق كوممۋنيكاتسيالار قىزمەتىندەگى بريفينگتە ب ا ق وكىلدەرىنىڭ ساۋالىنا وراي.

ايتا كەتەيىك، الماتى قالاسىنىڭ پروكۋراتۋراسى «شاكەن ايمانوۆ اتىنداعى قازاقفيلم» اكسيونەرلىك قوعامىن تەكسەرۋ قورىتىندىسى بويىنشا اسا ءىرى كولەمدە بيۋدجەت قاراجاتىن ۇرلاۋ فاكتىسىنە قاتىستى سوتقا دەيىنگى تەرگەپ-تەكسەرۋدى باستاعان بولاتىن. الدىن- الا مالىمەت بويىنشا فيلم تۇسىرۋگە بولىنگەن 400 ميلليون تەڭگەدەن استام قارجىنىڭ ۇرلانعانى انىقتالىپ وتىر.