قاسىم-جومارت توقايەۆ ريم پاپاسى XIV لەونى استاناعا شاقىردى
استانا. KAZINFORM - مەملەكەت باسشىسى ريم پاپاسى XIV لەوعا قۇتتىقتاۋ جەدەلحاتىن جولدادى، دەپ حابارلايدى اقوردانىڭ باسپا ءسوز قىزمەتى.
پرەزيدەنت قاسىم-جومارت توقايەۆ ريم پاپاسى XIV لەونى پونتيفيك بولعانىنا ءبىر جىل تولۋىمەن قۇتتىقتادى.
مەملەكەت باسشىسى حاتتا پونتيفيكتىڭ بەيبىتشىلىك يدەياسى مەن ديالوگتى ىلگەرىلەتۋ جونىندەگى دايەكتى ۋاعىزى ادامي قادىر-قاسيەتتى دارىپتەپ، حالىقتار مەن كونفەسسيالار اراسىنداعى ءوزارا تۇسىنىستىكتى نىعايتۋدىڭ سەنىمدى تىرەگى ەكەنىن اتاپ وتكەن. پرەزيدەنت قازاقستان مەن كيەلى تاق اراسىندا ۇزاق جىلدان بەرى كەلە جاتقان دوستىق پەن تىعىز ىنتىماقتاستىقتى جوعارى باعالايتىنىن جانە بايلانىستاردى ودان ءارى تەرەڭدەتۋ نيەتىن جەتكىزدى.
سونداي-اق قاسىم-جومارت توقايەۆ كاتوليك شىركەۋىنىڭ باسشىسىن استاناعا شاقىراتىنىن تاعى دا راستادى.
- ءسىزدىڭ ساپارىڭىز سەرىكتەستىگىمىزگە جاڭا مازمۇن دارىتىپ، ايماقتاعى ەلەۋلى ۋاقيعاعا اينالاتىنىنا سەنىمدىمىن،-دەدى قازاقستان پرەزيدەنتى.
مەملەكەت باسشىسى پاپا XIV لەوعا ىزگى مۇراتىن ىسكە اسىرۋ جولىندا زور دەنساۋلىق جانە قاجىماس قايرات تىلەدى.
بۇعان دەيىن مەملەكەت باسشىسى قاسىم-جومارت توقايەۆ وتان قورعاۋشى كۇنىمەن قۇتتىقتاعانىن جازدىق.
