قارىزىنىڭ كوپتىگىنەن 12 قازاقستاندىق سۋيتسيد جاساعان
نەسيەسىن تولەي الماعان قازاقستاندىقتار ءوز- وزىنە قول سالىپ، ءتۇرلى قىلمىستار جاساۋعا ءماجبۇر بولۋدا. بۇل تۋرالى ىشكى ىستەر ءمينيسترىنىڭ ورىنباسارى يگور لەپەحا پارلامەنتتە ايتتى، دەپ حابارلايدى Kazinform.
ايتۋىنشا، تىم كوپ نەسيە الۋ جانە ونى تولەي الماۋدىڭ كەسىرىنەن قارىز الۋشىلاردىڭ ءوزىن-ءوزى ءولتىرۋى عانا ەمەس، قىلمىسقا بارۋ فاكتىلەرى دە ورىن الۋدا.
«بيىل نەسيە العان 12 ازامات ءوز-وزىنە قول سالدى. نەسيە وتەۋ ءۇشىن قاجەتتى اقشانى «تابۋ» ماقساتىندا تىم كوپ نەسيە العان باسقا 40 ازامات توناۋ، قاراقشىلىق جانە ۇرلىق سەكىلدى ءتۇرلى قىلمىستار جاساعان»، - دەدى يگور لەپەحا بۇگىنگى پارلامەنتتىك تىڭداۋدا.
ايتا كەتەيىك، بۇگىن ماجىلىستە «حالىقتىڭ شامادان تىس كرەديت الۋىن ازايتۋ جانە قارجى ساۋاتتىلىعىن ارتتىرۋ» تاقىرىبىندا پارلامەنت تىڭداۋى ءوتتى.
بۇعان دەيىن يگور لەپەحا كيبەرقىلمىسقا قارسى تۇرۋ ءۇشىن بارلىق وڭىرلەردە «CyberPol» مامانداندىرىلعان جەدەل تەرگەۋ توپتارى قۇرىلعانىن، جابىرلەنۋشىلەرگە «ءبىر تەرەزە» قاعيداتىمەن قىزمەت كورسەتىلەتىنىن ايتقان ەدى.
سونداي-اق مينيستر ورىنباسارى شەتەلدىك الاياقتاردىڭ قوڭىراۋلارى بۇعاتتالعانىن، الايدا قازاقستاندىقتاردىڭ وزدەرى ازداعان سىياقى ءۇشىن ولارعا جاردەم بەرىپ وتىرعانىن ايتتى.
الداعى ۋاقىتتا قازاقستاندىقتار SIM- كارتانى تىركەۋدە بيومەتريادان وتۋگە مىندەتتەلەتىنى دە بەلگىلى بولدى.
