قارىزى بار ادامنىڭ شوتىندا قانشا اقشا قالۋى كەرەك؟
استانا. KAZINFORM - قازاقستان ۇلتتىق بانكى بورىشكەرلەردىڭ بانكتىك شوتتارىندا كۇنكورىسكە قاجەتتى قاراجاتتى ساقتاۋعا جانە قارىز سوماسىنان ارتىق اقشانىڭ بۇعاتتالۋىنا جول بەرمەۋگە قاتىستى زاڭناماعا وزگەرىستەر ەنگىزۋدى ۇسىندى.
بۇل تۋرالى قۇرىلتايدىڭ «اۋىل»، Respublica جانە «ادىلەت» فراكسيالارى دەپۋتاتتارىنىڭ ۇسىنىستارىنا بەرىلگەن جاۋاپتا ايتىلعان.
ۇلتتىق بانكتىڭ مالىمەتىنشە، قولدانىستاعى زاڭنامادا بانك مەرزىمى وتكەن كرەديتتىك بەرەشەكتى تولەم تالابى ارقىلى ءوندىرىپ العان كەزدە كليەنتتىڭ شوتىنداعى اقشانىڭ 50 پايىزىنان اسپايتىن بولىگىن ەسەپتەن شىعارۋ جانە شوتتا اي سايىن ەكى ەڭ تومەنگى كۇنكورىس دەڭگەيىنە تەڭ سومانى ساقتاۋ مىندەتى كوزدەلگەن. 2026-جىلى بۇل سوما 101702 تەڭگەنى قۇرايدى.
الايدا بۇل تالاپ سوت ورىنداۋشىلارىنىڭ ينكاسسولىق وكىمدەرىن ورىنداۋ كەزىندە قولدانىلمايدى. قولدانىستاعى زاڭناما بويىنشا بانكتەر سوت ورىنداۋشىسىنىڭ وكىمىن ورىنداۋعا مىندەتتى، ال بورىشكەردىڭ شوتىندا كۇنكورىسكە قاجەتتى سومانى ساقتاۋ مۇمكىندىگى قاراستىرىلماعان.
ۇلتتىق بانك تۇسىندىرگەندەي، جالاقىدان نەمەسە وزگە دە كىرىستەن ءوندىرىپ الۋ كەزىندە بورىشكەردىڭ تابىسىنىڭ كەمىندە 50 پايىزى ساقتالۋعا ءتيىس. سونىمەن قاتار، اليمەنت ءوندىرۋ جانە دەنساۋلىققا كەلتىرىلگەن زياندى وتەۋ جاعدايلارىن قوسپاعاندا، بورىشكەردە قالاتىن سوما ەڭ تومەنگى كۇنكورىس دەڭگەيىنەن كەم بولماۋى كەرەك. ءبىراق بۇل تالاپتار سوت ورىنداۋشىلارىنىڭ بانكتىك شوتتاردان اقشا ءوندىرىپ الۋىنا تىكەلەي قاتىستى ەمەس.
بىرنەشە شوتتاعى قاراجات قاتار بۇعاتتالۋى مۇمكىن
ۇلتتىق بانكتىڭ مالىمەتىنشە، ءىس جۇزىندە سوت ورىنداۋشىلارى بورىشكەردىڭ ءارتۇرلى بانكتەردەگى بارلىق شوتتارىنا قارىزدىڭ تولىق سوماسىنا تىيىم سالۋى مۇمكىن. سونىڭ سالدارىنان شوتتاردا ناقتى بەرەشەك مولشەرىنەن بىرنەشە ەسە كوپ قاراجات بۇعاتتالادى.
وسىعان بايلانىستى ۇلتتىق بانك زاڭناماعا ەكى نەگىزگى وزگەرىس ەنگىزۋدى ۇسىندى.
بىرىنشىدەن، سوت ورىنداۋشىلارىنىڭ ينكاسسولىق وكىمدەرىن ورىنداۋ كەزىندە بورىشكەردىڭ بانكتىك شوتىندا ەڭ تومەنگى كۇنكورىس دەڭگەيىنە قاجەتتى سومانى ساقتاۋدىڭ ءتارتىبىن بەكىتۋ قاجەت.
ەكىنشىدەن، بورىشكەردىڭ بىرنەشە بانكتىك شوتى بولعان جاعدايدا، ءبىر شوتتا تىيىم سالىنعان سومانىڭ ءوندىرىپ الۋدى قامتاماسىز ەتۋگە جەتكىلىكتى بولۋى ەسكەرىلىپ، باسقا شوتتارعا قايتالاما تىيىم سالۋ ءتارتىبىن رەتتەۋ ۇسىنىلدى. سونداي-اق بانكتەرگە باسقا شوتتار بويىنشا تىيىم سالۋ تۋرالى قاۋلىلاردى سوت ورىنداۋشىلارىنا قايتارۋ قۇقىعىن بەرۋ كوزدەلىپ وتىر.
ۇلتتىق بانك ءتيىستى ۇسىنىستاردى ادىلەت مينيسترلىگىنە جولداعانىن جانە قاجەتتى زاڭنامالىق تۇزەتۋلەردى مۇددەلى مەملەكەتتىك ورگاندارمەن بىرلەسىپ پىسىقتاۋعا دايىن ەكەنىن حابارلادى.
