قارين ەسىرتكى تاسىمالداۋشى جاستاردىڭ جازاسىن جەڭىلدەتۋگە قاتىستى پىكىر ءبىلدىردى
استانا. KAZINFORM - مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەسىرتكى، پسيحوتروپتىق زاتتاردىڭ، سول تەكتەستەردىڭ، پرەكۋرسورلاردىڭ جانە كۇشتى اسەر ەتەتىن زاتتاردىڭ زاڭسىز اينالىمىنا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.
وسى ورايدا مەملەكەتتىك كەڭەسشى Telegram-داعى جازباسىندا اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا پرەزيدەنت قولداۋ كورسەتكەن باستامالاردىڭ ءبىرى تانىمال قۇقىق قورعاۋشى ايمان وماروۆانىڭ ەسىرتكىنى جاسىرىن ورنالاستىرۋشىلارعا جازانى سارالاۋ تۋرالى بولعانىن اتاپ وتەدى.
- جاڭا تۇزەتۋلەرمەن تەڭگەرىمدى جانە ءادىل ءادىستى قامتاماسىز ەتۋ ءۇشىن مۇنداي قىلمىستى العاش رەت جاساعان ءارى اۋىرلاتاتىن ءمان- جايلار بولماسا ەسىرتكىنى جاسىرىن ورنالاستىرۋشىلارعا جازا ازداپ جەڭىلدەتىلەدى. سونىمەن قاتار ەسىرتكىلەردى دايىنداۋ، وڭدەۋ جانە وندىرگەنى ءۇشىن قىلمىستىق جاۋاپكەرشىلىكتى ءومىر بويىنا دەيىنگى باس بوستاندىعىن ايىرۋعا دەيىنگى قاتاڭداتاتىن نورما ەنگىزىلدى. سونداي- اق سينتەتيكالىق ەسىرتكى كومپونەنتتەرىنىڭ زاڭسىز اينالىمى ءۇشىن قىلمىستىق جاۋاپكەرشىلىك ەنگىزىلىپ وتىر، - دەدى ەرلان قارين.
مۇنان بولەك، مەملەكەتتىك كەڭەسشى ۇلتتىق قۇرىلتاي باستامالارىن جۇزەگە اسىرۋ اياسىندا قازىرگى ۋاقىتتا 9 زاڭنىڭ قابىلدانعانىن ەسكە سالادى.
ولار:
1. ايەلدەردىڭ قۇقىقتارى مەن بالالاردىڭ قاۋىپسىزدىگى ماسەلەلەرى جونىندەگى زاڭ.
2. ويىن بيزنەسى جانە قۇمارويىنعا تاۋەلدىلىكپەن كۇرەس ماسەلەلەرى جونىندەگى زاڭنامالىق تۇزەتۋلەر.
3. تۇتىنۋدىڭ ەلەكتروندى جۇيەلەرىن (ۆەيپتەر) اكەلۋگە، وندىرۋگە، ساتۋعا جانە تاراتۋعا زاڭمەن تىيىم سالۋ.
4. ۆانداليزم ءۇشىن جازانى زاڭمەن قاتاڭداتۋ جانە تابيعي، مادەني جانە تاريحي نىسانداردى قورعاۋدى ارتتىرۋ.
5. ونوماستيكا جانە گەرالديكا سالاسىنداعى پروتسەدۋرالاردى رەگلامەنتتەۋ جانە جۇمىستاردى ورتالىقتاندىرۋدى زاڭنامالىق تۇرعىدا جەلدىرۋ.
6. داڭقتى جاۋىنگەر- باتىرلاردىڭ اتىن «ايبىن» وردەنىنىڭ يەگەرلەرىنەدە بەرۋ.
7. رامىزدەردىڭ ءبىرىڭعاي ستاندارتى جونىندەگى تۇزەتۋلەر.
8. مەملەكەتتىك ناگرادالار جۇيەسىنە جاڭا قۇرمەتتى اتاقتاردى ەنگىزۋ جونىندەگى تۇزەتۋلەر.
