الماتىدا باس شىرشانى جاعۋ ءراسىمى 20- جەلتوقساندا وتەدى
الماتىدا جاڭا جىلدىق شىرشالار، ەرتەگى كەيىپكەرلەرى، باسقا دا مەرەكەلىك اتريبۋتتار جەلتوقسان ايىنىڭ ورتاسىنا قاراي قويىلا باستايدى.
قازىرگى ۋاقىتتا قالانى جاڭا جىلدىق بەزەندىرۋمەن اينالىساتىن كومپانيانى انىقتايتىن كونكۋرس ءوتىپ جاتىر. بۇل تۋرالى وڭىرلىك كوممۋنيكاتسيالار قىزمەتى الاڭىندا الماتى قالاسى اكىمىنىڭ ورىنباسارى ارمان قىرىقبايەۆ ايتتى، دەپ حابارلايدى Kazinform.
سپيكەر بيىكتىگى 20 مەتر بولاتىن قالانىڭ باستى شىرشاسى اباي الاڭىندا قويىلاتىنىن ايتتى. ونى رەسمي جاعۋ ءراسىمى مەن مەرەكەلىك كونسەرت 20- جەلتوقساندا وتەدى.
«جاڭا جىل مەرەكەسىنە وراي قالادا 60 دان استام شىرشا قويىلادى. قالا تۇرعىندارى مەن قوناقتارى ءۇشىن ءتۇرلى تاقىرىپتىق ءىس-شارالار، جاڭا جىلدىق فەستيۆالدار، شەبەرلىك سىنىپتارى، جاس سۋرەتشىلەردىڭ كورمەلەرى، كونسەرتتەر مەن ۇزدىك جاڭا جىلدىق بەينەروليككە قاتىستى موبيلوگرافتار اراسىندا بايقاۋلار وتەدى. اۋدانداردا جاڭا جىلدىق جارمەڭكەلەردە وتكىزۋ جوسپارلانىپ وتىر. سونىمەن بىرگە، اياز اتالاردىڭ شەرۋى وتەدى»، - دەدى ارمان قىرىقبايەۆ.
ونىڭ سوزىنشە، ينستاللياتسيالار، يلليۋميناتسيالار مەن فوتوايماقتار پانفيلوۆ، جىبەك جولى كوشەلەرى بويىندا، اباي، استانا الاڭدارى، تۇڭعىش پرەزيدەنت ساياباعى، اباي اتىنداعى ق ۇ و ب ت، ن. ساتس اتىنداعى بالالار مەن جاس وسپىرىمدەر تەاترى، «الماتى ارەنا» سپورت كەشەنى الاڭدارى مەن ءار اۋداندا بولادى.
«جاپپاي سىرعاناۋ ءۇشىن قالادا 22 اشىق مۇز ايدىنى ۇيىمداستىرىلادى. اشىق مۇز ايدىندارىنىڭ اۋماعىندا سپورتتىق ويىن-ساۋىق باعدارلامالار، كونكۋرستار، فلەشموبتار، جۇلدەلەرمەن ۇتىس ويىندارى، دەمالىس ايماقتارى مەن كوفە-پوينتتاردى ۇيىمداستىرۋ جوسپارلانىپ وتىر»، - دەدى قالا اكىمىنىڭ ورىنباسارى ارمان قىرىقبايەۆ.
