قارجىلىق ساۋاتتىلىقتى نەدەن باستاۋ كەرەك - مەنتور كەڭەسى
استانا. KAZINFORM - مەنتوردىڭ مالىمدەۋىنشە، جەكە شىعىنىن ەسەپتەپ جۇرەتىن ادام قارىزعا ۇرىنبايدى.
- قارجىلىق ساۋاتتىلىقتى - وتباسىدان باستاۋ كەرەك. ول كۇندەلىكتى تىرشىلىكتەگى ازىق- تۇلىك، كوممۋنالدىق، كيىم-كەشەك، بايلانىس تاعى باسقا وتباسىلىق شىعىنداردى باسقارۋدان باستاعان ءجون. ءوز شىعىنىن ەسەپتەپ جۇرەتىن ادام قارىزعا ۇرىنبايدى. كەيبىر قارجىلىق ساۋاتتىلىعىن ارتتىرۋعا كەلگەن ازاماتتار ايتىپ جاتادى، ايلىعىمىز جوعارى بولسا، قارىزعا كىرمەس ەدىك دەيدى. ال ەندى شىعىندارىن ەسەپتەپ، تالداعاندا قاجەتتى شىعىننىڭ كوبى بايقالادى، - دەدى «قارىزسىز قوعام» جوباسىنىڭ استانا قالاسى بويىنشا مەنتورى دۋلات مىڭبايەۆ استانا قالاسىنىڭ كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
سونداي-اق حالىق اراسىندا قارجىلىق ساۋاتتىلىق كۋرسىن وتكىزىپ جۇرگەن مەنتور وتباسىلىق شىعىن ماسەلەسى بويىنشا ناقتى مىسال كەلتىردى.
- 2023 -جىلى «قارىزسىز قوعام» جوباسى باستالعاندا مەن تۇركىستان وبلىسىندا بولىپ، قارجىلىق ساۋاتتىلىق بويىنشا دارىستەر وتكىزدىم. ساباقتا وتباسىلىق شىعىنداردى جازىپ باستاعاندا ءبىرىنشى كەزەكتە توي-دۋمان تۇر، ياعني ازاماتتار توي-تومالاق دەپ كورسەتكەن. ال سولتۇستىك وڭىرلەردە شىعىن كوبىنە ازىق- تۇلىك، كوممۋنالدىق تولەم تاعى سول سياقتى. سوندىقتان ارتىق شىعىندى قىسقارتىپ، ءار شىعىندى باسقارا بىلگەن ابزال، - دەگەن كەڭەس بەردى مامان.
ايتا كەتسەك، بۇگىندە 1,6 ميلليوننان اسا قازاقستاندىق 90 كۇننەن اسقان نەسيەسىن وتەي الماي ءجۇر.
ەسكە سالايىق، مەملەكەت باسشىسى بيىل جولداۋىندا حالىقتىڭ قارجىلىق ساۋاتىن ارتتىرۋ جانە قارىز جۇكتەمەسىن تومەندەتۋ ماسەلەسىنە ايرىقشا توقتالدى جانە «قارىزسىز قوعام» جوباسىن جالعاستىرۋدىڭ ماڭىزىن اتاپ ءوتتى.
وسى ورايدا ەلىمىزدە مەكتەپ قابىرعاسىنان باستاپ قارجىلىق ساۋاتتىلىقتى ارتتىرۋ يدەياسى العا تارتىلدى.
