قارجاۋباي نۇرىموۆ شەرزاتتىڭ قاشان جان تاپسىرعانىن ايتتى

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا شەرزات پولاتتىڭ ولىمىنە بايلانىستى سوت وتىرىسى ءوتىپ جاتىر.

بۇعان دەيىن شەرزاتتىڭ اكەسى قارجاۋباي نۇرىموۆ قايعىلى وقيعاعا الىپ كەلگەن كيكىلجىڭ قالاي باستالعانىن باياندادى.

قارجاۋباي نۇرىموۆ وقيعانى بايانداۋ بارىسىندا جاراقات العان شەرزات پولات پەن نۇرقانات عايىپبايەۆتى قالاي ەمحاناعا اپارعانىن ەسكە الدى.

- اجىراتقانعا، «قوي» دەگەنگە ەشقايسىسى قاراعان جوق. شەرزاتتىڭ اناسى بالاسىن قۇشاقتاپ، ۇرعىزباي جاتتى. سويلەپ وتىرعان بالانى نۇرقياس مىلتىقپەن ۇردى. اناسىنىڭ جىلاۋىنا، وتىنىشىنە قارامادى. بالاعا پىشاق تىققانىن بىلمەدىم. بالاعا سوققى ءتيدى ما دەپ الدىنان قارادىم، سويتسەم جاۋىرىنىنا كىرىپتى. ارتىنان قان اعىپ جاتىر ەكەن. نۇرقانات تا ەس-ءتۇسسىز جاتتى. كولىكتى وتالدىرىپ كەلگەندە ەكەۋىندە دە پۋلس بولدى. ولاردى ءوزىم كولىككە سالدىم. اۋرۋحاناعا اپارا جاتقان كەزدە كولىكتى قاتتى ايداعاننان بالام ورىندىقتان قۇلاپ كەتتى. سودان توقتادىم. سويتسەم جانى (شەرزات) شىعىپ كەتىپتى. پۋلس بولماي قالدى. ءوزىم رەانيماتسيا جاسادىم. سوسىن ءارى قاراي اۋرۋحاناعا جەتكىزدىم، - دەدى ول.

- كولىكتىڭ ىشىندە جان تاپسىردى ما؟ - دەپ ناقتىلادى پروكۋرور.

- مەن كولىككە سالىپ جاتقان كەزدە جان تاپسىرىپ جاتتى، سوڭعى دەمدەرى، - دەدى جابىرلەنۋشى.

ەسكە سالايىق، بىلتىر 4-قازان كۇنى توبەلەستەن 16 جاستاعى جاس ءوسپىرىم قايتىس بولعانىن جازعان ەدىك.

2024-جىلدىڭ 12-قازانىندا قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

2024-جىلدىڭ جەلتوقسان ايىندا تالعار ماڭىندا شەرزات پولاتتىڭ اعاسى ءولى تابىلدى.

بيىل اقپان ايىندا شەرزات ىسىنە قاتىستى قىلمىستى تەرگەۋ اياقتالدى. قىلمىستىق ءىس 62 تومنان تۇرادى. تەرگەۋ بارىسىندا 40 سوت ساراپتاماسى جۇرگىزىلىپ، شامامەن 200 كۋاگەردەن جاۋاپ الىنعان.