قاراتومار سۋ قويماسىنا كەلىپ جاتقان سۋ كولەمى ساعات سايىن ازايا باستادى
استانا. KAZINFORM - قوستاناي وبلىسىنداعى قاراتومار سۋ قويماسىنا كەلىپ جاتقان سۋ كولەمى ساعات سايىن ازايا باستادى.
بۇل تۋرالى سۋ رەسۋرستارى جانە يرريگاتسيا مينيسترلىگىنىڭ رەسمي وكىلى ءمولدىر ابدۋاليەۆا ورتالىق كوممۋنيكاتسيالار قىزمەتىندە وتكەن بريفينگىدە ءمالىم ەتتى.
«قاراعاندى وبلىسىنىڭ 4 ءىرى سۋ قويماسى %100 سۋ جينادى، مۇندا دا سۋ تاسقىنىنىڭ بەلسەندى كەزەڭى اياقتالدى. قوستاناي وبلىسىنداعى ەكى ءىرى سۋ قويماسى ورتا ەسەپپەن %96 سۋ جينادى. مۇندا سۋدىڭ ارناسىنان كوتەرىلۋى بايقالادى. وڭىردە قاراتومار سۋ قويماسى بويىنشا جاعداي كۇردەلى بولعان. مۇندا سەكۋندىنا 2425 تەكشە مەتر سۋ كەلىپ، سەكۋندىنا 2640 تەكشە مەتر سۋ جىبەرىلىپ جاتىر. بۇگىندە سۋ اعىنى ساعات سايىن ازايىپ كەلەدى. سولتۇستىك قازاقستان وبلىسىنىڭ ەكى ءىرى سۋ قويماسى %100 تولدى. مۇندا دا سۋ ارناسىنان اسىپ كەتىپ وتىر»، - دەدى ءمولدىر ابدۋاليەۆا.
