قاراقۋلار ماحابباتقا ادال ما - عالىمدار زەرتتەۋى
استانا. KAZINFORM - اۋستراليالىق عالىمدار اققۋلاردىڭ ماحابباتقا ادالدىعى تۋرالى ءميفتى جوققا شىعاردى. جۇپتارى جاراسقان قۇستاردىڭ بىرنەشە ايدان كەيىن كەم دەگەندە 10 پايىزى ەكى جاققا قوش ايتىسىپ كەتەتىن كورىنەدى.

ت ا س س اگەنتتىگىنىڭ مالىمەتىنشە، ارنايى زەرتتەۋ جۇرگىزگەن مەلبۋرن ۋنيۆەرسيتەتىنىڭ بيولوگتارى 18 جىل بويى قالالىق ساياباقتا قارا اققۋلاردى (قاراقۋ، تەك اۋستراليادا كەزدەسەتىن اققۋ ءتۇرى) باقىلاعان.
«ءبىز ۇزاق جىلدار بويى جۇپ قۇرعان اققۋلاردى باقىلادىق. 18 جىل ىشىندە جۇپتارى جازىلماعان ءبىر جۇپتى عانا كوردىك»، - دەدى مەلبۋرن ۋنيۆەرسيتەتىنىڭ بيولوگيالىق عىلىمدار مەكتەبىنىڭ قىزمەتكەرى راۋل مالدەر.
بيولوگتەر اققۋلاردى سوناۋ 2006 -جىلى مەلبۋرنداعى البەرت ساياباعىندا زەرتتەي باستاعان. زەرتتەۋ بارىسىندا ولار 2 مىڭ قۇستىڭ ءومىرىن باقىلاعان. باقىلاۋدىڭ العاشقى كەزەڭدەرىندە عالىمدار شىنىمەن دە اققۋلاردىڭ ماحابباتقا ادال ەكەنىنە كوز جەتكىزە باستاعان. ءبىراق، بارلىعى بىردەي ەمەس. دەسە دە، ستاتيستيكانى تۇزگەندە اققۋلاردىڭ ءومىر ءسۇرۋ ۇزاقتىعىن ەسەپكە العان ءجون. اققۋلاردىڭ شامامەن 10 پايىزىنىڭ عۇمىرى قىسقا بولادى ەكەن. سايكەسىنشە، اجىراسۋ تۋرالى اڭگىمە قوزعاۋدىڭ ءوزى ارتىق.
سونداي- اق، عالىمدار ماحابباتى بەرىك جۇپتار كەيدە ءۇزىلىس جاساپ، بىرنەشە اي ءبىر- بىرىنەن الشاقتاپ، كەيىن قايتادان قوسىلاتىنىن انىقتاعان. بۇل - ۇزاق جىل بىرگە بولۋ ءۇشىن جاسالعان قادام بولۋى مۇمكىن. قۇستارعا ورناتىلعان ترەكەرلەردىڭ دەرەكتەرىنە سۇيەنسەك، جۇپتاردىڭ 40 پايىزى دەرلىك ەكى- ءۇش ايعا دەيىن ءۇزىلىس الىپ، بولەك ۋاقىت وتكىزەدى ەكەن.
«ءۇزىلىس العانداردىڭ جارتىسى ماڭگىلىككە اجىراسىپ كەتتى. ءبىراق قالعاندارى قايتا جۇپ جاراستىردى، بۇرىنعىداي ءبىر- بىرىنە ادال بولدى»، - دەدى ۋنيۆەرسيتەت اسپيرانتى ۆينسەنت نوۋلز.
قارا اققۋ - قازتارىزدىلەر توبىنا ءارى اققۋلار تۇقىمداسىنا جاتاتىن قۇس. العاش رەت 1697 -جىلى اۋستراليانىڭ پەرت قالاسىنا جاقىن جەردە تابىلعان. قارا اققۋ اۋستراليا ماتەريگىندە كەزدەسەتىن اققۋدىڭ جالعىز ءتۇرى. 19-عاسىردىڭ ورتاسىندا بۇل قۇس جاڭا زەلاندياعا اكەلىنىپ، كوبەيە باستاعان. بۇگىندە كەيدە ەۋروپا مەن سولتۇستىك امەريكانىڭ قالالىق ساياباقتارى مەن قورىقتارىندا ارنايى ۇستالادى. اققۋلاردىڭ باسقا تۇرلەرىنەن ايىرماشىلىعى - قونىس اۋدارۋعا بەيىلدى ەمەس.