قاراكولدەگى اققۋلاردى قولدان ازىقتاندىرۋ ەكوجۇيەگە زيان تيگىزەدى - ساراپشى

ساراپشىلار «ماڭعىستاۋ وبلىسىنداعى قاراكولدە قىرىلعان اققۋلاردىڭ قورەك تاپپاي ءولۋى مۇمكىن ەمەس» دەگەن تۇجىرىم ايتتى، دەپ حابارلايدى Kazinform.

بۇل تۋرالى قازاقستان بيوالۋانتۇرلىلىكتى ساقتاۋ اسسوتسياتسياسىنىڭ عىلىم جونىندەگى ديرەكتورى سەرگەي سكليارەنكو ماڭعىستاۋ وبلىسىنىڭ قوعامدىق كوممۋنيكاتسيا ورتالىعىنداعى سۇحباتتا مالىمدەدى. ساراپشى قۇستاردىڭ ءولىمىنىڭ ءارتۇرلى سەبەپتەرى بار ەكەنىن اتاپ وتىر. ونىڭ ىشىندە قۇس تۇماۋى مەن اشىعۋدان ۋلانۋعا دەيىنگى بىرنەشە نۇسقا اتالدى.

«ماڭعىستاۋدا بوتۋليزمگە بايلانىستى ۇيرەكتەردىڭ جاپپاي قىرىلۋ وقيعاسى بولدى. ءبىراق اققۋلارعا قاتىستى قورىتىندى جاساۋعا ءالى ەرتە. قونىس اۋداراتىن قۇستاردىڭ الىس قاشىقتىققا جەم ىزدەۋ قابىلەتىن ەسكەرە وتىرىپ، قۇستاردىڭ دۇرىس تاماقتانباۋ نۇسقاسى ەكىتالاي بولىپ كورىنەدى. ولار ءۇشىن جۇزدەگەن شاقىرىم كەدەرگى ەمەس، بۇل ولارعا ءومىر ءسۇرۋدىڭ وڭتايلى جاعدايلارىن تاڭداۋعا مۇمكىندىك بەرەدى. ەگەر قاراكول كولىندە اققۋلارعا ىڭعايسىز بولىپ، اشتىق سەزىنسە، ولار باسقا جەرگە ۇشىپ كەتەر ەدى»، - دەيدى سەرگەي سكليارەنكو.

ونىڭ ايتۋىنشا، اققۋلار اشتىقتان ولمەگەندىكتەن، قۇستاردى تاماقتاندىرۋ يدەياسى نەگىزسىز بولىپ سانالادى. سوندىقتان قولدان تاماقتاندىرۋ قاراكول كولىنىڭ ەكوجۇيەسىنە اسا ءقاۋىپ ءتوندىرۋى مۇمكىن.

«اققۋلار نەگىزىنەن بالدىرلارمەن قورەكتەنەتىنىن ەسكەرسەك، قاراكول كولىنە ازىق تاسۋ دۇرىس ەمەس. وندا اققۋلاردى تاماقتاندىرۋ اقىلعا قونىمسىز بولىپ كورىنەدى. ويتكەنى بۇل سۋدىڭ لاستانۋىنا جانە ۋلانۋعا، قۇستار مەن ەكوجۇيەگە زيان كەلتىرۋى مۇمكىن. ەگەر اققۋلار قاتتى اياز كەزىندە قاتىپ قالسا عانا، ارالاسۋعا بولادى. مۇنداي جاعدايدا ولار قۇتقارۋدى قاجەت ەتەدى. الايدا، باسقا جاعدايلاردا كومەك كورسەتۋ ءتيىمسىز. بۇل جاعدايدا ۆاكتسيناتسيا مۇمكىن ەمەس، ويتكەنى ءبىز جابايى تابيعاتتا قونىس اۋداراتىن قۇستار تۋرالى ايتىپ وتىرمىز. سۋ قويماسىنا كىرۋدى شەكتەۋ جانە قۇس فابريكالارى مەن ءۇي قۇستارىنىڭ اۋلالارىندا قاۋىپسىزدىكتى كۇشەيتۋ - بۇل ستاندارتتى الدىن الۋ شارالارى»، - دەدى ساراپشى.

سەرگەي سكليارەنكونىڭ پىكىرىنشە، اققۋلاردى قۇتقارۋ جانە قاراكول كولىنىڭ ەكوجۇيەسىن ساقتاۋ ورنيتولوگتاردىڭ مۇقيات زەرتتەۋلەرى مەن ءۇستىرت مەملەكەتتىك تابيعي قورىعىنىڭ كۇشەيتىلگەن قورعاۋىنىڭ ارقاسىندا عانا مۇمكىن بولماق.

قازىرگى ۋاقىتتا ماڭعىستاۋ وبلىسىندا اققۋلاردان قۇس تۇماۋىنىڭ انىقتالۋىنا بايلانىستى كارانتين جاريالانعان جوق. سونىمەن بىرگە، قاراقيا - قاراكول تابيعي قورىعىنىڭ قاراكول كولىندە اققۋلاردىڭ جاپپاي قىرىلۋ سەبەپتەرىن انىقتاۋ جۇمىستارى جالعاسىپ جاتىر. بۇعان دەيىن قىرىلعان اققۋلار سانى التى جۇزدەن اسقانى ءمالىم بولدى.

 

اۆتور
ەربول جانات