قاراكولدە قىرىلعان اققۋلار سانى ءتورت جۇزدەن اسىپ جىعىلدى

ماڭعىستاۋ وبلىسىنداعى قاراكولدە قىرىلعان اققۋلاردىڭ سانى 400 دەن استى. بۇل تۋرالى وڭىرلىك ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسىنىڭ باسشىسى عابباس دوساتوۆ مالىمدەدى، دەپ حابارلايدى Kazinform.

اققۋلاردىڭ قىرىلۋىنىڭ سەبەبى رەتىندە قۇس تۋماۋى ەكەنى بۇعان دەيىن بەلگىلى بولدى. الايدا 21-جەلتوقساننان بەرى قۇس تورەسىنىڭ قىرىلۋى تولاستار ەمەس.

«قازىرگى ۋاقىتتا اققۋلاردىڭ قىرىلۋىنا قاتىستى ءتيىستى جۇمىستار جالعاسىپ جاتىر. ءبىزدىڭ ينسپەكتورلار ولاردىڭ ناقتى سانىن انىقتادى. جەلتوقسان ايىنان بەرى قىرىلعان اققۋ سانى 412 گە جەتىپ وتىر. ال ولاردى جويۋ، ۆاكسيناتسيالاۋ سەكىلدى جۇمىستارمەن اينالىسۋ ءبىزدىڭ قۇزىرەتىمىزگە كىرمەيدى»، - دەدى باسقارما باسشىسى عابباس دوساتوۆ.

ال ماڭعىستاۋ وبلىسى ۆەتەريناريا باسقارماسىنىڭ باسشىسى بەردىبەك مارقابايەۆ قاراكولدەگى قۇستاردىڭ قىرىلۋىن قورەكتىڭ جەتىسپەۋىمەن ءتۇسىندىردى. ونىڭ سوزىندە، وبلىس بويىنشا 2023 -جىلدىڭ كۇز مەزگىلىنەن بەرى بەس مىڭنان استام قۇس ۆاكسيناتسيادان وتكەن.

«مۇنايلى، ءتۇپقاراعان، قاراقيا اۋدانى مەن اقتاۋ قالاسى اۋماعىن مەكەندەيتىن قۇستار لەگى ۆاكسيناتسيالانعانى بەلگىلى. ولاي دەيتىنىمىز، بۇل تەڭىزگە جاقىن ورنالاسقان ايماق سانالادى. وبلىستا اققۋلاردىڭ قىرىلۋىنىڭ بىرنەشە سەبەبى بار. جاپپاي قىرىلۋىن قۇستاردىڭ يممۋنيتەتىنىڭ السىزدىگى مەن قورەكتىك زاتتاردى تولىق تابا الماۋىمەن بايلانىستىرىپ وتىرمىز»، - دەدى بەردىبەك مارقابايەۆ.

ايتا كەتەتىن جايت، ماڭعىستاۋ وبلىسىنداعى قاراكول اۋماعىندا سۋ سىنامالارىن تەكسەرۋ كەزىندە شەكتەن تىس كونسەنتراتسياسىنان اسپاعانىن انىقتادى. بۇل ورايدا ەكولوگيا دەپارتامەنتى كولدىڭ سۋى قۇستار ءۇشىن قاۋىپتى ەمەس ەكەنىن مالىمدەگەن بولاتىن.

سونداي-اق ماڭعىستاۋ وبلىسىندا ەرەكشە قورعاۋداعى قاراكول كولىنىڭ جاعاسىنان اققۋلاردىڭ ولەكسەسى تابىلعان سوڭ ءتيىستى ساراپتاما جۇمىستارى جاسالدى. قازىرگى ۋاقىتتا قۇستاردى جويۋ جۇمىستارى ۆەتەريناريالىق زاڭنامادا بەلگىلەنگەن تارتىپپەن جۇزەگە اسىرىلىپ جاتىر.