قاراشىعاناقتا جىلىنا 5 ميلليارد تەكشە مەتر گاز وڭدەيتىن زاۋىت 2031-جىلى ىسكە قوسىلادى
استانا. KAZINFORM - قاراشىعاناق كەن ورنىندا جىلىنا 5 ميلليارد تەكشە مەتر شيكى گاز وڭدەيتىن زاۋىت سالۋ جوباسى جۇزەگە اسىرىلىپ جاتىر.
جوبالاۋ جانە قۇرىلىسقا دايىندىق جۇمىستارى جۇرگىزىلۋ ۇستىندە. ەرتە جەر جۇمىستارىنىڭ باستالۋى 2027-جىلعا، ال كاسىپورىندى پايدالانۋعا بەرۋ 2031-جىلعا جوسپارلانعان.
سونىمەن قاتار باتىس قازاقستان وبلىسىندا گاز جانە جىلۋ ينفراقۇرىلىمىن دامىتۋعا، سونداي-اق ەلدى مەكەندەردى گازبەن قامتۋعا باعىتتالعان جوبالار ىسكە اسىرىلىپ جاتىر. بۇل تۋرالى ق ر ەنەرگەتيكا ۆيتسە-ءمينيسترى ەرلان اكباروۆتىڭ وڭىرگە جۇمىس ساپارى بارىسىندا ءمالىم بولدى.
ۆيتسە-مينيستر وبلىس تۇرعىندارىمەن كەزدەسۋىندە گازبەن جابدىقتاۋدى دامىتۋ، جىلۋ جەلىلەرىن جاڭعىرتۋ جانە قاراشىعاناق كەن ورنىندا جاڭا گاز وڭدەۋ قۋاتتارىن قۇرۋ جوبالارىن تانىستىردى.
باتىس قازاقستان وبلىسى ەلىمىزدەگى گازداندىرۋ دەڭگەيى ەڭ جوعارى وڭىرلەردىڭ قاتارىنا كىرەدى. 2026-جىلدىڭ باسىنداعى جاعداي بويىنشا وبلىس حالقىنىڭ %99,7 ى، ياعني 694 مىڭنان استام ادام 372 ەلدى مەكەندە تابيعي گازبەن قامتاماسىز ەتىلگەن. سوعان قاراماستان، وڭىردە گاز ينفراقۇرىلىمىن دامىتۋ جۇمىستارى جالعاسىپ جاتىر.
2026-جىلى اقجايىق جانە تەرەكتى اۋداندارىنىڭ، سونداي-اق بايتەرەك اۋدانىنىڭ ەلدى مەكەندەرىن گازبەن قامتاماسىز ەتۋ ماقساتىندا «روستوشي - تايپاق» گاز قۇبىرى قۇرىلىسىنىڭ ءبىرىنشى كەزەگىن جالعاستىرۋعا رەسپۋبليكالىق بيۋجەتتەن 1,2 ميلليارد تەڭگە قاراستىرىلعان. بۇدان بولەك، ينفراقۇرىلىمدى دامىتۋ قورىنان وبلىستىڭ گاز جانە ىلەسپە ينفراقۇرىلىمىن دامىتۋعا باعىتتالعان ءتورت جوباعا 3 ميلليارد تەڭگەدەن استام قاراجات ءبولىندى.
- وڭىردە گازداندىرۋ دەڭگەيى جوعارى بولعانىمەن، ينفراقۇرىلىمدى ودان ءارى دامىتۋ وزەكتىلىگىن جوعالتپايدى. تۇرعىندار ءۇشىن ۇيلەردىڭ گازبەن جانە جىلۋمەن سەنىمدى قامتاماسىز ەتىلۋى ماڭىزدى بولسا، كاسىپورىندار ءۇشىن وندىرىستىك قىزمەتتى تۇراقتى جوسپارلاۋ مۇمكىندىگى ماڭىزدى. سوندىقتان جەلىلەردى جاڭارتۋ جانە گاز وڭدەۋ قۋاتتارىن دامىتۋ مينيسترلىكتىڭ وبلىستاعى جۇمىسىنىڭ باسىم باعىتتارى بولىپ قالا بەرەدى، - دەپ اتاپ ءوتتى ق ر ەنەرگەتيكا ۆيتسە-ءمينيسترى ەرلان اكباروۆ.
وڭىردەگى ماڭىزدى باعىتتاردىڭ ءبىرى - ورال قالاسىنىڭ جىلۋمەن جابدىقتاۋ جۇيەسىن جاڭعىرتۋ. بيىل ت م-2 -جىلۋ ماگيسترالىن رەكونسترۋكسيالاۋ جۇمىستارىن جالعاستىرۋعا رەسپۋبليكالىق بيۋجەتتەن 1,5 ميلليارد تەڭگە ءبولىندى. بۇعان دەيىن جوبانى ىسكە اسىرۋدى باستاۋعا قاجەتتى قاراجات ۇكىمەت رەزەرۆىنەن باعىتتالعان بولاتىن.
سونىمەن قاتار 2027-2029-جىلدارعا ارنالعان رەسپۋبليكالىق بيۋجەت جوباسىندا زاچاگانسك كەنتىندەگى 1-قازاندىقتان تارتىلعان جىلۋ جەلىلەرىن رەكونسترۋكتسيالاۋدى باستاۋعا 1,2 ميلليارد تەڭگەدەن استام قاراجات قاراستىرىلعان. بۇل جوبالار تۇرعىن ۇيلەر مەن الەۋمەتتىك نىساندارعا جىلۋ بەرۋدىڭ سەنىمدىلىگىن ارتتىرۋعا باعىتتالعان.
قاراشىعاناق كەن ورنىندا گازدى كەرى ايداۋعا ارنالعان التىنشى كومپرەسسور بويىنشا ىسكە قوسۋ- باپتاۋ جۇمىستارى دا جالعاسىپ جاتىر. اتالعان جابدىق گاز ءوندىرۋ دەڭگەيىن قالىپتى ۇستاپ تۇرۋعا ارنالعان. قازىرگى ۋاقىتتا كومپرەسسور سىناق رەجيمىندە جۇمىس ىستەپ تۇر. ونى ونەركاسىپتىك پايدالانۋعا كوشىرۋ 2026-جىلعى قاراشاعا جوسپارلانعان.
جاڭا گاز وڭدەۋ زاۋىتىن ىسكە قوسۋ ىشكى نارىققا جەتكىزىلەتىن تاۋارلىق گاز كولەمىن ارتتىرۋعا مۇمكىندىك بەرەدى.
ۆيتسە-مينيستر ءوڭىردى مۇناي ونىمدەرىمەن قامتاماسىز ەتۋ جانە اۋىل شارۋاشىلىعى تاۋارىن وندىرۋشىلەرگە جانار-جاعارماي جەتكىزۋ ماسەلەلەرى جونىندە دە اقپارات بەردى. كۇزگى دالا جۇمىستارىنا باتىس قازاقستان وبلىسى ءۇشىن 11,2 مىڭ توننا ديزەل وتىنى قاراستىرىلعان. ماتەريالدار دايىندالعان كەزدەگى جاعداي بويىنشا ونىڭ 7,7 مىڭ تونناسى جونەلتىلگەن. اۋىل شارۋاشىلىعى تاۋارىن وندىرۋشىلەرگە جانارماي جەتكىزۋ وتىنىمدەرگە سايكەس باسىم تارتىپپەن جۇزەگە اسىرىلىپ جاتىر.
تۇرعىندارمەن كەزدەسۋ اياقتالعاننان كەيىن ەرلان اكباروۆ ازاماتتاردى جەكە ماسەلەلەرى بويىنشا قابىلدادى. وبلىس تۇرعىندارى اۋىلدىق ەلدى مەكەندەردى ساپالى ەلەكترمەن جابدىقتاۋ، جەكەلەگەن ۋچاسكەلەردى گازداندىرۋ جانە تاريفتەردى قالىپتاستىرۋ ماسەلەلەرىن كوتەردى. كەلىپ تۇسكەن بارلىق ءوتىنىش ق ر ەنەرگەتيكا مينيسترلىگىنىڭ بەيىندى قىزمەتتەرى تاراپىنان ودان ءارى پىسىقتاۋ ءۇشىن باقىلاۋعا الىندى.
وسىعان دەيىن قاشاعانداعى العاشقى گاز وڭدەۋ زاۋىتىن 2027-جىلى ىسكە قوسۋ جوسپارلانعانى تۋرالى جازدىق.
