قاراشادا اسپاندا جۇلدىز جاۋىپ، ءتورت عالامشار قاتار كورىنەدى

سونداي-اق اي ادەتتەگىدەن ۇلكەنىرەك ءارى جارىعىراق بولىپ كورىنەتىن سۋپەر اي قۇبىلىسى كۇتىلەدى.

بۇل قۇبىلىستاردى قاشان جانە قالاي باقىلاۋعا بولاتىنىن فەسەنكوۆ اتىنداعى استروفيزيكا ينستيتۋتىنىڭ قىزمەتكەرى سۆەتلانا موشكينا ءتۇسىندىردى.

قاراشادا ءۇش رەت جۇلدىز جاۋادى

قاراشانىڭ 4 ىنەن 5 ىنە قاراعان ءتۇنى وڭتۇستىك تاۋريدتەر مەتەور اعىنىنىڭ بەلسەندىلىگى شارىقتاۋ شەگىنە جەتەدى. بۇل ۋاقىتتا اسپاننان ساعاتىنا 10 عا دەيىن مەتەوردى بايقاۋعا بولادى.

اتالعان مەتەور اعىنى ەنكە كومەتاسىمەن بايلانىستى. ونى 20-قىركۇيەكتەن 20-قاراشاعا دەيىن باقىلاۋعا مۇمكىندىك بار. ال بەلسەندىلىگى كۇشەيەتىن كۇندەرى اي جارىعى باسەڭ بولاتىندىقتان، جۇلدىز جاۋىنىن كورۋگە قولايلى جاعداي قالىپتاسادى.

ءبىر اپتادان كەيىن، 11-قاراشادان 12-قاراشاعا قاراعان ءتۇنى سولتۇستىك تاۋريدتەر مەتەور اعىنىنىڭ بەلسەندىلىگى ارتادى. ول 2004 TG10 استەرويدىمەن بايلانىستى. بۇل جولى ساعاتىنا بەسكە دەيىن مەتەور كورىنۋى مۇمكىن.

ال 17-قاراشادان 18-قاراشاعا قاراعان ءتۇنى لەونيدتەر مەتەور اعىنى شارىقتاۋ شەگىنە جەتەدى. استرونومداردىڭ بولجامىنشا، ساعاتىنا 15 كە دەيىن مەتەوردى بايقاۋعا بولادى. تەمپەل-تۋتتل كومەتاسىمەن بايلانىستى بۇل قۇبىلىس 6-30-قاراشا ارالىعىندا بايقالادى.

حالىق اراسىندا «اققان جۇلدىز» دەپ اتالاتىن مەتەورلار عارىشتاعى ۇساق بولشەكتەردىڭ جەر اتموسفەراسىنا ەنىپ، قىزۋىنان پايدا بولادى. سونىڭ ناتيجەسىندە اسپاندا قىسقا ۋاقىتقا جارقىراعان ءىز قالادى.

NASA ماماندارى جۇلدىز جاۋىنىن تاماشالاۋ ءۇشىن قالا جارىعىنان الىس، اسپانى اشىق جەردى تاڭداۋعا كەڭەس بەرەدى. كوزدىڭ قاراڭعىلىققا بەيىمدەلۋىنە شامامەن 30 مينۋت قاجەت. مەتەورلاردى كورۋ ءۇشىن ارنايى قۇرالدىڭ قاجەتى جوق.

14-قاراشادا ءتورت عالامشار قاتار كورىنەدى

14-قاراشا كۇنى تاڭ اتپاي تۇرىپ اسپاننان مەركۋريي، شولپان، مارس جانە يۋپيتەردى ءبىر مەزگىلدە بايقاۋعا بولادى. بىرنەشە عالامشاردىڭ اسپاننىڭ ءبىر بولىگىندە قاتار كورىنۋى «عالامشارلار شەرۋى» دەپ اتالادى.

مارس پەن يۋپيتەر ءتۇننىڭ باسىم بولىگىندە كورىنسە، شولپان مەن مەركۋري كۇن شىعار الدىندا عانا كوكجيەكتەن كوتەرىلەدى.

الايدا بۇل قۇبىلىستى قازاقستاننىڭ بارلىق تۇرعىنى بىردەي تولىق باقىلاي المايدى.

الماتى تۇرعىندارى تەك مارس پەن يۋپيتەردى كورە الادى. ويتكەنى شولپان مەن مەركۋريدى تاۋلار جاۋىپ قالادى. ال قازاقستاننىڭ شىعىس جانە وڭتۇستىك باعىتتاعى كوكجيەگىن تاۋلار جاپپايتىن وزگە وڭىرلەرىندە ءتورت عالامشاردى دا باقىلاۋعا مۇمكىندىك بار، - دەپ ءتۇسىندىردى سۆەتلانا موشكينا.

ماماننىڭ ايتۋىنشا، مارس، يۋپيتەر جانە شولپاندى جاي كوزبەن كورۋگە بولادى. ال مەركۋريدى تابۋ ءۇشىن ءدۇربى نەمەسە اۋەسقوي تەلەسكوپ قاجەت بولۋى مۇمكىن.

24-قاراشادا سۋپەر اي قۇبىلىسى بولادى

24-قاراشا كۇنى قازاقستان ۋاقىتىمەن ساعات 19:53 تە اي تولادى. استرونومنىڭ مالىمەتىنشە، بۇل جولعى تولعان اي سۋپەر اي قۇبىلىسىنا سايكەس كەلەدى.

سۋپەر اي - ايدىڭ جەرگە بارىنشا جاقىنداعان كەزەڭىندە تولۋى. اي جەردى سوپاقشا وربيتا بويىمەن اينالاتىندىقتان، ولاردىڭ اراقاشىقتىعى ۇنەمى وزگەرىپ وتىرادى.

وسىنداي ساتتە اي ادەتتەگى تولعان ايعا قاراعاندا ءسال ۇلكەنىرەك ءارى جارىعىراق بولىپ كورىنەدى. بۇل قۇبىلىستى ارنايى قۇرالسىز-اق تاماشالاۋعا بولادى.

اي بىرنەشە عالامشاردىڭ جانىنان وتەدى

قاراشا ايىندا اي اسپاندا بىرنەشە عالامشارعا جاقىن ورنالاسادى. اتاپ ايتقاندا:

2-قاراشادا - مارس پەن يۋپيتەرگە؛

7-قاراشادا - شولپانعا؛

8-قاراشادا - مەركۋريگە؛

20-قاراشادا - نەپتۋن مەن ساتۋرننىڭ اراسىنا؛

24-قاراشادا - ۋراننىڭ سولتۇستىك جاعىنا؛

30-قاراشادا - يۋپيتەر مەن مارسقا جاقىن كورىنەدى.

كەيبىر ەلدەردە اي عالامشارلاردىڭ الدىنان ءوتىپ، ولاردى ۋاقىتشا جاۋىپ قالادى. ماسەلەن، 30-قاراشادا يۋپيتەردىڭ اي تاساسىندا قالۋىن ارگەنتينا، چيلي جانە انتاركتيدا اۋماعىنان باقىلاۋعا بولادى.

ال قازاقستاندا اتالعان عالامشارلاردىڭ اي تاساسىندا قالۋ قۇبىلىستارى كورىنبەيدى.

استرونوميالىق قۇبىلىستاردى باقىلاۋ مۇمكىندىگى اۋا رايىنا دا بايلانىستى. سوندىقتان ماماندار اسپان اشىق بولاتىن ۋاقىتتى تاڭداپ، قالا شامدارىنان الىس جەرگە شىعۋعا كەڭەس بەرەدى.

el.kz