قاراشا ايىندا 6 مىڭنان استام قازاقستاندىق قىزىلشا جۇقتىردى - مينيستر

دەنساۋلىق ساقتاۋ ءمينيسترى اجار عينيات ۇكىمەت وتىرىسىندا ەلدەگى ەپيدەميولوگيالىق احۋال تۋرالى باياندادى، دەپ حابارلايدى Kazinform.

«الەمنىڭ 167 ەلىندە قىزىلشا بويىنشا جاعداي كۇردەلەنىپ كەلەدى. ەلىمىزدە وسى جىلى قىزىلشانىڭ 17 مىڭنان استام جاعدايى تىركەلدى. ونىڭ 82 پايىزدان استامى - بالالار اراسىندا. ونىڭ ىشىندە ۆاكتسينا الماعان بالالار - 83 پايىز. قىزىلشا سىرقاتى بارلىق وڭىردە تىركەلدى. جوعارى دەڭگەي شىمكەنت قالاسىندا بايقالادى - 3 مىڭنان استام جاعداي. الماتى قالاسى مەن جامبىل وبلىسىندا - 2 مىڭنان استام جاعداي، الماتى، ماڭعىستاۋ، اقتوبە، قىزىلوردا جانە اتىراۋ وبلىستارىندا 1 مىڭنان استام جاعداي تىركەلدى»، - دەدى ۆەدومستۆو باسشىسى.

ءمينيستردىڭ سوزىنشە، سىرقاتتانۋ جاعدايلارىنىڭ كۇرت ارتۋى قىركۇيەك ايىنان باستالعان.

«ياعني وقۋ جىلىندا ۇيىمداسقان ۇجىمداردا بالالاردىڭ جينالۋىنا بايلانىستى بايقالادى. سالدارىنان سىرقاتتانۋ دەڭگەيى ەكى ەسە كوبەيدى. قاراشا ايىندا 6 مىڭنان استام جاعداي تىركەلدى»، - دەدى اجار عينيات.

بۇگىن ۇكىمەت باسشىسى ءاليحان سمايىلوۆ قىزىلشاعا قارسى ۆاكتسينا الۋدان باسقا جول جوق ەكەنىن اتاپ ءوتتى.

جەلتوقسان ايىندا قازاقستاندا 2-5 جاستاعى بالالاردى قىزىلشاعا قارسى ەگۋ باستالادى.