قاراعاندىدا ستۋدەنتتەردىڭ 2 ميلليون تەڭگەدەن اسا اقشاسىن يەمدەنگەن ايەل ۇستالدى
استانا. KAZINFORM - قاراعاندىدا ستۋدەنتتەرگە ارزان باسپانا ۇسىنىپ، اقشاسىن يەمدەنگەن 31 جاستاعى ايەل ۇستالدى.
كۇدىكتى الەۋمەتتىك جەلىدە شىن مانىندە جوق پاتەرلەردى جالعا بەرۋ تۋرالى حابارلاندىرۋ جاريالاپ، جابىرلەنۋشىلەردەن الدىن الا تولەم الىپ وتىرعان. الاياقتىق سحەما تامىزدا باستالعان. جارناماداعى پاتەرلەردىڭ سۋرەتتەرى ينتەرنەتتەن الىنعان.
ارزان باسپانا ىزدەگەن جاستار حابارلاندىرۋدا كورسەتىلگەن نومىرگە حابارلاسىپ، پاتەردى جالعا الۋ ءۇشىن الدىن الا تولەم جاساعان. الايدا اقشا اۋدارىلعاننان كەيىن ايەل بايلانىسقا شىعۋدى توقتاتقان. ال ۋادە ەتىلگەن پاتەرلەر شىن مانىندە بولماعان.
بىرنەشە جابىرلەنۋشى پوليتسياعا شاعىمدانىپ، كەيىن جەدەل قىزمەتكەرلەر كۇدىكتىنى ۇستاعان. تەرگەۋ بارىسىندا الاياقتىقتىڭ 10 دەرەگى دالەلدەنگەن.
«جابىرلەنۋشىلەرگە كەلتىرىلگەن جالپى شىعىن 2,2 ميلليون تەڭگەدەن استى. بارلىعى - ارزان باسپانا ىزدەگەن ستۋدەنتتەر. كۇدىكتىگە قاتىستى الاياقتىق دەرەگى بويىنشا سوتالدى تەرگەۋ جۇرگىزىلىپ جاتىر»، - دەدى ءى ءى م وكىلدەرى.
