قاراعاندى وبلىسىن 2032 -جىلعا دەيىن قانداي وزگەرىستەر كۇتىپ تۇر
استانا. KAZINFORM - قاسىم-جومارت توقايەۆقا قاراعاندى وبلىسىنىڭ الەۋمەتتىك- ەكونوميكالىق دامۋى جونىندە مالىمەت بەرىلدى، دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسىنا قاراعاندى وبلىسىنىڭ نەگىزگى الەۋمەتتىك-ەكونوميكالىق دامۋ كورسەتكىشتەرى، ينۆەستيتسيالىق جوبالاردىڭ جۇزەگە اسىرىلۋى جانە ءوڭىردى ودان ءارى جاڭعىرتۋ جوسپارى تۋرالى اقپارات ۇسىنىلدى.
توعىز ايدىڭ قورىتىندىسى بويىنشا وبلىس ەكونوميكاسى 2,9 پايىزعا ارتىپ، ونەركاسىپ ءوندىرىسى 4,9 پايىزعا ۇلعايدى.
ايتارلىقتاي قارقىن ماشينا جاساۋ سالاسىندا بايقالدى، ءوسىم - 26,2 پايىز.
ءوڭىردىڭ 2032 -جىلعا دەيىنگى ينۆەستيتسيالىق پورتفەلى جالپى قۇنى 7 تريلليون تەڭگەنى قۇرايتىن 186 جوبادان تۇرادى. ونى ىسكە اسىرۋ 36 مىڭ جۇمىس ورنىن اشۋعا مۇمكىندىك بەرەدى.
جاڭا ءوندىرىس ورىندارىن قۇرۋعا، شيكىزاتتى قايتا وڭدەۋگە، مينەرال- شيكىزات بازاسىن نىعايتۋعا، سونداي-اق وتاندىق جانە شەتەلدىك ينۆەستورلاردى تارتۋعا ەرەكشە نازار اۋدارىلىپ وتىر.
بۇدان بولەك، پرەزيدەنتكە اگروونەركاسىپ كەشەنى مەن تۇرعىن ءۇي قۇرىلىسىن ىلگەرىلەتۋ، الەۋمەتتىك ينفراقۇرىلىمدى جاڭعىرتۋ جۇمىستارى جونىندە باياندالدى.
سوڭعى ءۇش جىلدا قاراعاندى وبلىسىندا اۋىلدارعا ارنالعان 92 دەنساۋلىق ساقتاۋ نىسانى مەن 13 مەكتەپ سالىنىپ، ءبىلىم بەرۋ مەكەمەلەرىن جاڭارتۋ جۇمىستارى جالعاسىپ جاتىر.
سپورت، مادەنيەت، ەنەرگەتيكا جانە تۇرعىن ءۇي-كوممۋنالدىق شارۋاشىلىعى باعىتتارىنداعى جوبالار قولعا الىندى.
«تازا قازاقستان» باعدارلاماسى اياسىندا ەلدى مەكەندەر اباتتاندىرىلىپ، جاڭا قوعامدىق كەڭىستىكتەر مەن ەكوساياباقتار بوي كوتەرۋدە.
بولجامعا سايكەس، جىل قورىتىندىسى بويىنشا وبلىس ەكونوميكاسى 4 پايىزعا وسەدى.
ونەركاسىپ الەۋەتىن كەڭەيتۋ، ينۆەستيتسيالىق جوبالاردى ىسكە اسىرۋ جانە حالىقتىڭ ءومىر ءسۇرۋ ساپاسىن ارتتىرۋ ارقىلى ءوڭىردى ودان ءارى وركەندەتۋ جۇمىستارى جالعاسا بەرەدى.
بۇعان دەيىن پرەزيدەنت Qarmet ميللياردتاعان شىعىننان ارىلىپ، تازا پايداعا شىققانىن ايتتى.
